प्रधानमंत्री नरेन्द्र मोदी शुक्रकेँ जन औषधि दिवस पर सभ नागरिककेँ उच्च गुणवत्तावला सस्ता दवाइ उपलब्ध करयबाक आ स्वस्थ एवं तन्दुरूस्त भारत सुनिश्चित करबाक सरकारक प्रतिबद्धता दोहरौलनि।
प्रधानमंत्री मोदी MyGovindia पोर्टलक पोस्ट केर साझा करैत एक्स पर कहलनि, “जन औषधि दिवस लोकसभकेँ उच्च गुणवत्तावला आ सस्ता दवाइ उपलब्ध करयबाक हमर प्रतिबद्धताकेँ दर्शाबैत अछि, जाहिसँ स्वस्थ आ तन्दुरूस्त भारत बनैत अछि। एहि प्रकरणमे एहि दिशामे उठायल गेल डेगक झलक भेटैत अछि।”
माई गॉव इंडिया पोर्टल सोशल मीडिया प्लेटफॉर्म एक्स पर कहलक जे प्रधानमंत्रीक नेतृत्वमे जन औषधि पहल भारतक स्वास्थ्य सेवा क्षेत्रमे एकटा आमूलचूल बदलावक रूपमे उभरल अछि। बहुत कम लागतमे गुणवत्तापूर्ण दवाइ उपलब्ध कराकऽ ई लाखो लोक, विशेष रूपसँ गरीब आ मध्यम वर्गपर वित्तीय बोझ कम कऽ रहल अछि।
देश भरिमे १५,००० सँ बेसी जन औषधि केन्द्रक सङ्ग, सस्ता स्वास्थ्य सेवा आब प्रत्येक घरक लेल वास्तविकता बनि गेल अछि। आवश्यक दवाइसँ लऽ कऽ जीवन रक्षक उपचार धरि ई पहल ई सुनिश्चित करैत अछि जे बेसी लागतक कारण कोनो व्यक्ति नीक स्वास्थ्यसँ वंचित नहि रहय।
एम्हर केन्द्रीय स्वास्थ्य मंत्री जेपी नड्डा एक्स पर कहलनि जे प्रधानमंत्री श्री नरेन्द्र मोदीक दूरदर्शी नेतृत्वमे प्रधानमंत्री जन औषधि योजना ‘नीक आ किफायती’क मंत्रक सङ्ग स्वास्थ्य सेवाकेँ बदलि देलक अछि। भारतभरिमे १५,००० सँ बेसी जन औषधि केन्द्रक सङ्ग, ई पहल ५०-९०% कम दामपर आवश्यक दवाइ प्रदान करैत अछि, जाहिसँ ई सुनिश्चित होइत अछि जे कोनो व्यक्ति पर्याप्त स्वास्थ्य सेवासँ वंचित नहि रहय।
पीएम मोदीक पहल पर पीएमबीजेपीक विषयमे जागरूकता बढ़ेबाक लेल आ जेनेरिक दवाइकेँ बढ़ावा देबाक लेल प्रत्येक वर्ष ७ मार्चकेँ “जन औषधि दिवस” मनाओल जाइत अछि। सरकार जेनेरिक दवाइसभक उपयोगकेँ बढ़ावा दैत रहत, आ एहि योजनामे आओर वृद्धि होयत, जाहिसँ सार्वजनिक स्वास्थ्यमे सुधार आ भारतमे उद्यमशीलताकेँ बढ़ावा देबयमे एकर भूमिका मजबूत होयत।
