केन्द्रीय रसायन आ उर्वरक राज्य मंत्री अनुप्रिया पटेल मंगलदिन राज्यसभामे एकटा प्रश्नक उत्तरमे पीएम-प्रणाम पहलक जानकारी दैत सूचित कयलनि जे आर्थिक मामिलाक मंत्रिमंडलीय समिति (सीसीईए) २८ जून, २०२३ केँ ‘धरती-माँकेँ रिस्टोरेशन, जागरूकता सृजन, पोषण आ सुधारक लेल पीएम कार्यक्रम (पीएम-प्रणाम)”केँ मंजूरी देलक अछि।
पीएम-प्राणम पहलक उद्देश्य उर्वरकक स्थायी आ संतुलित उपयोगकेँ बढ़ावा देब, वैकल्पिक उर्वरकेँ अपनयबाक आ जैविक आ प्राकृतिक खेतीकेँ बढ़ावा दऽ कऽ पृथ्वी माताक स्वास्थ्यकेँ बचाबय लेल राज्य आ केंद्र शासित प्रदेशक प्रयासकेँ समर्थन देनाइ अछि।
केन्द्रीय वित्त मंत्री निर्मला सीतारमण वैकल्पिक उर्वरक आ रासायनिक उर्वरकक संतुलित उपयोगकेँ बढ़ावा देबाक लेल बजट २०२३मे “पीएम प्राणम योजना” शुरू करबाक घोषणा कयलनि। सीतारमण अपन भाषणमे कहने छलीह जे ‘धरती माताक पुनरुद्धार, जागरूकता, पोषण आ सुधारक लेल पीएम कार्यक्रम’ (पीएम प्रणाम) राज्य आ केंद्र शासित प्रदेशसभकेँ वैकल्पिक उर्वरक आ रासायनिक उर्वरकक संतुलित उपयोगकेँ बढ़ावा देबाक लेल प्रोत्साहित करबाक लेल शुरू कयल जायत। सीतारमण इहो कहलखिन कि अगिला ३ सालमे हम १ करोड़ किसानकेँ प्राकृतिक खेती अपनाबयमे मदद करब। एकरा लेल १०,००० जैव-इनपुट संसाधन केंद्र स्थापित कयल जायत, जे राष्ट्रीय स्तर पर वितरित सूक्ष्म-उर्वरक आ कीटनाशक निर्माण नेटवर्कक निर्माण करत।
रसायन आ उर्वरक मंत्रालय काल्हि एकटा वक्तव्यमे कहलक जे पीएम-प्राणम पहलक उद्देश्य राज्य आ केंद्र शासित प्रदेश द्वारा शुरू कयल गेल प्रयासकेँ बल प्रदान करब अछि। एहि प्रयाससभमे उर्वरकक सतत आ संतुलित उपयोगकेँ बढ़ावा देनाइ, वैकल्पिक उर्वरककेँ अपनेनाइ, जैविक आ प्राकृतिक खेतीकेँ बढ़ावा देनाइ आदि सम्मिलित अछि।
मंत्रालय बतेलक सभ राज्य आ केंद्र शासित प्रदेश पीएम-प्रणामक अन्तर्गत आबैत अछि। ई ध्यान देल जा सकैत अछि जे एहि योजनाक अन्तर्गत राज्य/केन्द्र शासित प्रदेश द्वारा कोनो विशेष वित्तीय वर्षमे रासायनिक उर्वरक (यूरिया, डीएपी, एनपीके, एमओपी) के खपतमे कमीक माध्यमसँ उर्वरक सब्सिडीक ५०% बचत कयल जायत जे पछिला तीन सालक औसत खपतक तुलनामे आ ओहि राज्य/केंद्र शासित प्रदेशक अनुदानक रूपमे देल जायत। राज्य आ केंद्र शासित प्रदेश एहि अनुदानक उपयोग किसान सहित राज्यक लोकक लाभक लेल कऽ सकैत अछि।
