बिहारमे शनिदिन एकटा आओर रेल दुर्घटना भेल। एहि दुर्घटनाक कारण क्षेत्रमे हलचल मचि गेल अछि। बिहारक मुंगेरमे कोयलासँ भरल मालगाड़ी अचानक चलैत-चलैत दू भागमे बँटि गेल। ई घटना मुंगेरक खड़िया पिपरा हॉल्ट लग भेल छल। कहल जा रहल अछि जे अचानक मालगाड़ीक कपलिंग टूटि गेल, जाहि कारण चलैत काल ट्रेन दू भागमे बँटि गेल।
जानकारीक अनुसार जमालपुर-भागलपुर रेलखंडक अप लाइन पर एकटा मालगाड़ी पर कोयला भरल छल, जे जमालपुर दिसि जा रहल छल। ई घटना भोरे लगभग ९ बजे भेल। दुर्घटनाक कारण जमालपुर-भागलपुर रेलखंड पर ट्रेन सेवा लगभग दू घंटा धरि बाधित रहल। एहिसँ कतेको ट्रेनक परिचालन सेहो प्रभावित भेल। कहल जा रहल अछि जे जखनि मालगाड़ीक ड्राइवरकेँ ट्रेन दुर्घटनाक जानकारी भेटल ताधरि मालगाड़ी कल्याणपुर स्टेशनक पास पहुँच गेल छल। गार्ड लोको पायलटकेँ दुर्घटनाक सूचना देलक, तकर बाद हुनका पता चलल जे मालगाड़ीक आधा हिस्सा टूटि गेल अछि आ बहुत दूर रहि गेल अछि। जाहि ठाम दुर्घटनामे बोगी अलग भऽ गेल छल, ओहि ठाम एकटा भागमे १०टा बोगी छल जखनि कि शेष २०टा बोगी दोसर भागमे छल।
बिहारक जमुई जिलाक झाझा रेलवे स्टेशनपर एकटा मालगाड़ी पटरीसँ उतरि गेल, जाहिसँ रेल यातायात बाधित भऽ गेल। एहि घटनामे कोनो हताहत होयबाक सूचना नहि अछि। अधिकारी लोकनि कहलनि जे ई घटना तखनि भेल जखनि मालगाड़ी स्टेशन सीमामे प्रवेश कऽ रहल छल। एहि घटनाक कारण अप लाइन पर रेल यातायात बाधित भेल छल। मजदूरसभ तत्काल मरम्मतक काज शुरू कऽ देलनि आ राति ८.१५ बजे रेल यातायात बहाल कऽ देल गेल।
