अपराध गोलीक तड़तड़ाहटसँ थर्रायल हाजीपुर, अपराधी सरेआम तीनटा दोस्तकेँ मारलक गोली Maithil Punarjagran Prakash April 18, 2024 0 Comments हाजीपुर समदिया * हाजीपुरक आरएन कॉलेजक समीप बुधदिन सनसनी फैल गेल। किछ अज्ञात अपराधी दिनदहाड़े तीनटा दोस्तकेँ गोली मारि घटनास्थलसँ भागि गेल। घटनाक बाद स्थानीय लोकक मदतिसँ तीनू घायल दोस्तकेँ तत्काल सदर अस्पतालमे भर्ती कराओल गेल। जतए हुनकर इलाज चलि रहल अछि। एतय घटनाक सूचना भेटलाक बाद पुलिस घटनास्थल पर पहुँचि मामिलाक जाँच शुरू कऽ देलक। प्राप्त जानकारीक अनुसार तीनू मित्र आरएन कॉलेज लग बैसल एक दोसरासँ गप्प कऽ रहल छलाह। एम्हर ओतय पहुँचल अज्ञात अपराधी अचानक अंधाधुंध गोलीबारी शुरू कऽ देलक। एहि गोलीबारीमे तीनू मित्रकेँ गोली लागल। घायलक पहिचान बड़ी यशुपुरक निवासी अभिषेक कुमार, साहिल कुमार आ छोटू कुमार भेल अछि। घटनाक सूचना भेटैत पुलिस घटनास्थल पर पहुँचल आ क्षेत्रकेँ घेरि लेलक। अपराधीसभक पहिचान करबाक लेल लगपासमे लागल सीसीटीवी कैमराकेँ स्कैन कयल जा रहल अछि। मामिलाक जाँच करबाक लेल पुलिसक टीम सदर अस्पताल सेहो पहुँचल। वर्तमानमे अपराधीसभकेँ एखन धरि गिरफ्तार नहिं कयल गेल अछि। पुलिस ओकरा गिरफ्तार करबाक लेल छापा मारि रहल अछि। गौरतलब अछि जे रामनवमीक पाबनि लेल आइ पूरा शहरमे सुरक्षाक कड़ा इंतजाम कयल गेल छल। पैघ संख्यामे पुलिस बल आ मजिस्ट्रेट तैनात कयल गेल छल। एकर बादो अपराधी घटनाक अंजाम देलाक बाद भागि गेल। एहि घटनाक बाद क्षेत्रमे दहशतक माहौल अछि। एहि घटना पर लोकमे आक्रोश अछि। Spread the love