राजनीति

नीतीश कुमारकेँ बदनाम करबाक साजिश रचल जा रहल अछि : पटनामे भेल मुठभेड़ पर गिरिराज सिंह

पटना समदिया
*

गिरिराज सिंह कहलनि जे बिहारमे नीतीश कुमारकेँ बदनाम करबाक साजिश रचल जा रहल अछि। जे कहैत छलाह जे ई बिहारमे जंगल राज अछि, एहि ठाम सेहो कार्यवाही भऽ रहल अछि।

मंगलदिन (08 जुलाई, 2025) भोरे पटना सिटीमे पुलिस मुठभेड़मे राजा नामक हथियार आपूर्तिकर्ताक पुलिस एनकाउंटर भेल। ओ 4 जुलाईकेँ पटनामे भेल गोपाल खेमका हत्याकांडमे शूटरकेँ हथियार देने छल। केंद्रीय मंत्री गिरिराज सिंह एहि मुठभेड़ पर बेगूसरायमे पत्रकारसँ गप करैत कहलनि, बिहारमे नीतीश कुमारकेँ बदनाम करबाक साजिश रचल जा रहल अछि, आतंक पसारल जा रहल अछि।

ओ आगू कहलनि, किछु लोक साजिश रचि कय नीतीश कुमारकेँ बदनाम करय लेल ई काज कय रहल छथि। जकर पर्दाफाश होबयवला अछि। ई एकटा राजनीतिक गिरोहक माध्यमसँ भऽ रहल अछि। एकरा साजिश कहि, ओ कहलनि जे बिहारमे एही तरहेँ उपद्रव कय बिहार सरकारकेँ बदनाम करबाक प्रयास भऽ रहल अछि।

दोसर दिसि गिरिराज सिंह एहि घटना पर विपक्ष पर हमला करैत कहलनि जे किछु लोक कूदि कए हुनकर (गोपाल खेमका) घर दिसि जाइत कहैत छल, अपराधी एखनि धरि नहि पकड़ल गेल अछि। आब काल्हिसँ वैह (विपक्ष) आवाज उठायत, जे अपराधी नहि मारल गेल, नागरिक मारल गेल।

गिरिराज सिंह आगू कहलनि जे, “जे कहि रहल छल जे ई बिहारमे जंगलराज अछि, एतय सेहो कार्यवाही होइत अछि। तेजस्वी यादव जे कूदैत छलाह आ कहैत छलाह, लालू यादवक शासनमे की होइत छल ? सीएम हाउसमे अपराधीक पंचायत बैसा कऽ राखल जाइत छल।” तेजस्वी यादव पर निशाना लगाबैत ओ कहलनि जे, “ओ नीतीश कुमारकेँ बदनाम करय लेल प्रेस कांफ्रेंस कय रहल छलाह। सवाल नंबर एक, सवाल नंबर दो… पुछैत छलथि, तँ सवाल पहिने अपने आपसँ पूछथि। ई नीतीश कुमारक सरकार अछि, जे अपराधी पर कार्यवाही करैत अछि। ओ लालू यादवक सरकार छल, जे अपराधीकेँ संरक्षित करैत छल। चलनी दूसय सूपके…”

Spread the love