तेजस्वी यादव वक्फ संशोधन बिल पर कहने छलथि जे ‘हमर सरकार बनिते एकरा कचराक डिब्बामे फेंकि देब। आब एहि पर पूर्व केंद्रीय मंत्री आ पटना साहिबसँ सांसद रविशंकर प्रसाद रविकेँ बिहार विधानसभामे विपक्षक नेता तेजस्वी यादवक वक्फ संशोधन पर देल गेल एहि बयान पर शायराना अंदाजमे प्रतिउत्तर देलनि अछि।
वास्तवमे, पत्रकार सभ रविशंकर प्रसादसँ तेजस्वी यादवक बिहारमे वक्फ संशोधन लागू नहि करबाक बयान पर प्रश्न कयलथि तऽ ओ अपन अंदाजमे कहलथि, “हुनकर सरकार आबऽ वाला अछि की ? ‘दिल बहलाने के लिए ग़ालिब यह ख्याल अच्छा है’।” अर्थात मैथिलीक कहावतमे, ‘नहिं नौ मन घी होएत आ नहिं राधा नचतीह।’
तेजस्वी यादव शनिकें कहलथि जे वक्फ संशोधन विधेयक केर विरोधमे राष्ट्रीय जनता दल लोकसभा आ राज्यसभामें अपन बात सभ पूर्ण मजबूतीसँ रखलक आ कड़ा विरोध कऽ कऽ एकर खिलाफ वोट कयलक। हुनक कहब छल जे जे लोक मुसलमानक हितैषी होयबाक नाटक करैत अछि, तिनकर पोल खुइल चुकल अछि। बिहारमे जखनि हमरा सरकार बनत तऽ वक्फ संशोधन विधेयक केर कोनो हालातमे लागू होबय नहि देब आ एकरा कचराक डिब्बामे फेंक देब।
एम्हर, कांग्रेसक नेता राहुल गांधीक बिहार दौरा पर आबएकेँ लऽ कऽ पटना साहिबक सांसद रविशंकर प्रसाद प्रश्नात्मक लहजामे कहलथि जे वक्फ संशोधन विधेयक पर लोकसभामे काफी चर्चा भेल, मुदा ओ बजलाह नहि। ओ चुप रहलथि, बहिन (प्रियंका) सेहो देखाई नहिं पड़लीह।अछि।
ओ कहलनि जे राहुल गांधीकेँ बिहार आबए केर अधिकार अछि, आबए दिअ। मुदा बिहारक जनता हुनका संग नहि अछि। कांग्रेसक नेता राहुल गांधी आइ सोमकेँ बिहार दौरा पर पटना आबि रहल छथि आ तीनटा कार्यक्रममे भाग लेताह। ओ पहिने बेगूसरायमे ‘पलायन रोको, नौकरी दो’ यात्रामे शामिल होएताह आ ओकरा बाद पटनामे संविधान सम्मेलनमे भाग लेताह। तकरा बाद ओ पार्टीक एकटा बैसारमे भाग लेताह।
