बिहारक उप मुख्यमंत्री सम्राट चौधरी बृहस्पतिकेँ लालू परिवार आ गांधी परिवार पर निशाना साधैत कहलाह जे एहि दुनूमे बहुत रास अंतर नहिं अछि। एकटा देशकेँ लूटलक, तऽ दोसर बिहारकेँ लूटलक।
पटनामे मीडियासँ बातचीतक दौरान तेजस्वी यादव द्वारा बिहारमे बिगड़ल कानून व्यवस्थाक प्रश्न उठयबा पर उप मुख्यमंत्री सम्राट चौधरी कहलाह जे तेजस्वी यादव कोन बदलाव कयलनि ? ओ एतय धरि सवाल कयलनि जे तेजस्वी यादव की छलाह ? ओ की कयलनि ? ओ बेचारा किछु नहिं छलथि, अपन डिपार्टमेंटमे तऽ लालू यादवक परिवार मात्र घोटाला कयलक अछि। एहिसँ अधिक किछु नहिं कयलक अछि।
ओ कहला जे बिहारमे नीतीश कुमारक सुशासन रहल अछि, वैऽह सुशासन आगू सेहो चलत। राहुल गांधीक बिहार आगमन पर उप मुख्यमंत्री सम्राट चौधरी कहलाह, “आबय दिअ। देखबाक चाही जे बिहार कोना बदलल। हुनकर पिता, हुनकर दादी, हुनकर माता ‘सुपर पीएम’, उनका परदादी देशकेँ लूटलनि।”
एहिसँ पहिने उपमुख्यमंत्री सम्राट चौधरी सम्पूर्ण क्रांति दिवसक सालगिरह पर लोकनायक जयप्रकाश नारायणकेँ श्रद्धांजलि अर्पित करैत कहलनि जे प्रधानमंत्री नरेंद्र मोदी आ मुख्यमंत्री नीतीश कुमारक नेतृत्वमे एनडीए सरकार जेपी केर सपनाक भारत बनबय लेल प्रतिबद्ध अछि।
ओ जेपी आंदोलनक सेनानी सभकेँ हुनक योगदान लेल बधाई देलनि आ कहलनि जे कतेको क्षेत्रमे आइयो ओ चुनौती सब अछि, जे 50 साल पहिनेहोँ रहय। एनडीए केर सभ दल ओहि चुनौती सभक विरुद्ध संघर्ष कऽ रहल अछि। आइ हमरा हुनकर सभक सेहो पहिचान करय परत, जे जेपीक नाम लऽ कऽ राजनीति कएलनि, मुदा सम्पूर्ण क्रांतिक आदर्शकेँ भ्रष्टाचारमे डुबा देलन्हि।
ओ कहलनि जे जेपी गरीब-पिछड़ा समाजसँ आबयवाला युवा लालू प्रसाद पर भरोसा कएलनि, मुदा ओएह बादमे पिछड़ा-विरोधी कांग्रेसक कोरामे बैस गेलथि। जेपी कांग्रेस शासनमे व्यापीत भ्रष्टाचारक विरुद्ध आंदोलन कऽ नेतृत्व कएलनि, जखनिकि ओही आंदोलनसँ निकसल लालू प्रसाद सत्ता भेटला पर भ्रष्टाचारक कोनो मौका नहि छोड़लनि।
