मुख्यमंत्री नीतीश कुमार बुध (०३ जुलाई) केँ मुख्यमंत्री सचिवालयमे ‘संवाद’ मे राजस्व आ भूमि सुधार विभागक तहत ९८८८ उम्मीदवारकेँ नियुक्ति पत्र सौंपलनि। एहिमे ३५३ विशेष सर्वेक्षण सहायक निपटान अधिकारी, ७५८ विशेष सर्वेक्षण कानूनगो, ७४२ विशेष सर्वेक्षण लिपिक आ ८,०३५ विशेष सर्वेक्षण अमीन सम्मिलित छथि।
मुख्यमंत्री प्रतीकात्मक रूपसँ २० उम्मीदवारकेँ नियुक्ति प्रदान कयलनि आ राजस्व एवं भूमि सुधार विभागक मंत्री डॉ. दिलीप कुमार जायसवाल पांच उम्मीदवारकेँ नियुक्ति देलनि। कार्यक्रमक दौरान कुल ७५ उम्मीदवारकेँ नियुक्ति पत्र देल गेल। शेष अभ्यर्थी सभकेँ सभ जिलाक प्रभारी मंत्री द्वारा नियुक्ति पत्र देल गेल।
कार्यक्रमकेँ सम्बोधित करैत मुख्यमंत्री नीतीश कुमार कहलनि जे राजस्व आ भूमि सुधार विभागक तहत आइ बांटल गेल नियुक्ति पत्र बहुत नीक अछि। हम बहुत पहिने नियुक्ति पत्र बांटय केर बारेमे सोचने छलहुं। हमरा खुशी अछि जे आइ ९८८८ अभ्यर्थीकेँ नियुक्ति पत्र देल गेल अछि। मुख्यमंत्री कहलनि कि सब जगह जमीनक विवाद अछि, ई केकर अछि, एकर फैसला नहिं भऽ पाबि रहल अछि। जमीन कतेको विवाद आ हत्याक कारण बनैत अछि। ६० प्रतिशत मामिला एकरासँ संबंधित रहैत अछि।
मुख्यमंत्री आगू कहलनि कि २००५ सँ हम सब काज शुरू कयलहुँ, तऽ एहि सब चीज पर सेहो काज शुरू भेल। हम सभ सोचलहुं जे जमीनसँ जुड़ल विवाद खतम हेबाक चाही। एक-एकटा चीज तय भऽ जयबाक चाही। ई तय भऽ जयबाक चाही जे केकर जमीन अछि। एकरा लेल बिहारमे भूमि सर्वेक्षणक काज शुरू कयल गेल छल। एरियल फोटोग्राफी २०१३ मे शुरू भेल छल। हम कामना करैत छी जे भूमि विवाद समाप्त भऽ जाय आ समाजमे शान्तिक वातावरण बनय। नीतीश कुमार नवनियुक्त अभ्यर्थी सभसँ आगू कहलनि जे आशा अछि जे अहाँ सब सर्वेक्षणक काज शीघ्रतासँ पूरा करब। मुख्यमंत्री अपर मुख्य सचिव आ मंत्रीकेँ जुलाई २०२५ धरि काज पूरा करबाक लेल कहलनि। ओ कहलनि जे जतेक जल्दी भूमि सर्वेक्षणक काज पूरा होयत, भूमि विवाद समाप्त भऽ जायत।
