केंद्र सरकार 2024-25 वित्त वर्षक लेल कर्मचारी भविष्य निधि (पीएफ) जमा पर 8.25 प्रतिशत ब्याज दरकेँ मंजूरी देलक अछि। ई ब्याज दर पिछला वित्त वर्षक समान राखल गेल अछि।
फरवरीमे, कर्मचारी भविष्य निधि संगठन (ईपीएफओ) 2025 वित्त वर्षक लेल कर्मचारी भविष्य निधि जमा पर ब्याज दर 8.25 प्रतिशत पर बना रखबाक घोषणा कयलक अछि। राष्ट्रीय राजधानीमे एकटा बैसारमे ईपीएफओ केर सेंट्रल बोर्ड ऑफ ट्रस्टी ई निर्णय लेलनि। वित्त मंत्रालय आब 2025 वित्त वर्षक लेल कर्मचारीक पीएफ पर 8.25 प्रतिशत ब्याज दरक मंजूरी देलक अछि। विश्वसनीय स्रोतक अनुसार, एही सप्ताह श्रम मंत्रालय द्वारा एकटा अधिसूचना सेहो सेवानिवृत्ति निधि निकायकेँ भेजल गेल अछि।
2024-25 केर लेल ईपीएफ पर ब्याज दर ईपीएफओ सदस्य केर खातामे जमा कयल जायत। ईपीएफओ पहिने अपन 7 करोड़ सदस्यक लेल ईपीएफ पर ब्याज दरकेँ 2022-23 मे 8.15 प्रतिशत सँ बढ़ा कय 2023-24 केर लेल 8.25 प्रतिशत कय देलक। एहि बीच, ईपीएफओ मार्चमे 14.58 लाख नेट सदस्य जोड़लक आ मार्च 2024 केर तुलनामे नेट पेरोल एडिशनमे 1.15 प्रतिशतक वृद्धि दर्ज कयलक। पीएफ संगठन मार्च 2025 मे लगभग 7.54 लाख नव ग्राहक नामांकित कयलक, जे फरवरी केर तुलनामे 2.03 प्रतिशतक वृद्धि आ मार्च 2024 केर तुलनामे सालाना आधार पर 0.98 प्रतिशतक वृद्धि दर्शाबैत अछि।
श्रम मंत्रालयक अनुसार, नव ग्राहकक वृद्धिक श्रेय बढ़ैत रोजगार अवसर, कर्मचारी लाभक बारेमे बढ़ैत जागरूकता आ ईपीएफओ केर सफल आउटरीच कार्यक्रम सभकेँ देल जा सकैत अछि।
आँकड़ाक एकटा महत्वपूर्ण पहलू 18-25 आयु वर्गक प्रभुत्व अछि, कारण 18-25 आयु वर्गमे 4.45 लाख नव ग्राहक जोड़ल गेल, जे मार्च 2025 मे जोड़ल गेल कुल नव ग्राहकक 58.94 प्रतिशत अछि। एकर अलावा, मार्चमे 18-25 आयु वर्गक लेल नेट पेरोल एडिशन लगभग 6.68 लाख रहल, जे मार्च 2024 मे पिछला वर्षक तुलनामे 6.49 प्रतिशतक वृद्धिकेँ दर्शाबैत अछि।
