तेलंगानामे सत्रह, आंध्र प्रदेशमे २५, उत्तर प्रदेशमे १३, बिहारमे पाँच, झारखण्डमे चारि, मध्य प्रदेशमे आठ, महाराष्ट्रमे ११, ओडिशामे चारि, पश्चिम बङ्गालमे आठ आ जम्मू-कश्मीरमे एकटा सीटक लेल १३ मईकेँ मतदान होएत।
आंध्र प्रदेश आ तेलंगाना सहित १० राज्य आ केंद्र शासित प्रदेशक ९६ लोकसभा सीटपर १३ मईकेँ लोकसभा चुनावक चारिम चरणक प्रचार शनिदिन साँझ समाप्त भऽ गेल। आन्ध्र प्रदेशक सभटा २५ लोकसभा सीट आ सभटा १७५ विधानसभा सीटपर १३ मईकेँ मतदान होयत। लोकसभा चुनावक चारिम चरणमे चुनाव अभियानमे आरक्षण, तुष्टिकरण नीति, भ्रष्टाचार आ रोजगार सन मुद्दा हावी रहल।
एहि चरणमे प्रमुख उम्मीदवारमे समाजवादी पार्टी (सपा) अध्यक्ष अखिलेश यादव (कन्नौज-यूपी), केंद्रीय मंत्री गिरिराज सिंह (बेगूसराय-बिहार) आ नित्यानंद राय (उजियारपुर-बिहार), कांग्रेस नेता अधीर रंजन चौधरी (बहरामपुर-पश्चिम बंगाल), भाजपा केर पंकजा मुंडे (बीड-महाराष्ट्र), एआईएमआईएम प्रमुख असदुद्दीन ओवैसी (हैदराबाद-तेलंगाना) आ आंध्र प्रदेश कांग्रेस अध्यक्ष वाई एस शर्मिला (कडप्पा) शामिल छथि।
केन्द्रीय मंत्री अजय कुमार मिश्र खीरी (यूपी) सीटसँ हैट्रिक लेबाक दौड़मे छथि। हुनकर बेटा २०२१ केर लखीमपुरी हिंसा मामिलामे आरोपी छथि। तृणमूल कांग्रेसक महुआ मोइत्रा सेहो पश्चिम बंगालक कृष्णनगर सीटसँ फेरसँ संसद पहुँचबाक प्रयास कऽ रहल छथि। प्रश्न पूछबाक बदलामे नगद स्वीकार करबाक कारणेँ हुनका लोकसभासँ निष्कासित कऽ देल गेल छल।
तेलंगानामे सत्रह, आंध्र प्रदेशमे २५, उत्तर प्रदेशमे १३, बिहारमे पाँच, झारखण्डमे चारि, मध्य प्रदेशमे आठ, महाराष्ट्रमे ११, ओडिशामे चारि, पश्चिम बंगालमे आठ आ जम्मू-कश्मीर (श्रीनगर) केर एकटा लोकसभा सीटपर सोमदिन मतदान होयत।भाजपाक नेतृत्ववला एनडीए लग एखन एहि ९६ लोकसभा सीटमेसँ ४०सँ बेसी सीटपर सांसद अछि।
आन्ध्र प्रदेशक १७५ विधानसभा सीटपर सेहो मतदान होयत। राज्यमे वाईएसआरसी, कांग्रेसक नेतृत्ववला ‘इंडिया’ गठबन्धन आ राजगक बीच त्रिकोणीय मुकाबला देखल जा रहल अछि। राज्यमे राजगमे भाजपा, चन्द्रबाबू नायडूक टीडीपी आ पवन कल्याणक जनसेना पार्टी सम्मिलित अछि।
आन्ध्र प्रदेशमे वाईएसआरसीपी सभटा १७५ विधानसभा आ २५ लोकसभा सीटपर चुनाव लड़ि रहल अछि। राजगमे टीडीपी १४४ विधानसभा आ १७ लोकसभा सीटपर चुनाव लड़ि रहल अछि, जखन कि भाजपा छओ लोकसभा सीट आ १० विधानसभा सीटपर चुनाव लड़ि रहल अछि। जन सेना दूटा लोकसभा सीट आ २१ विधानसभा सीटपर चुनाव लड़ि रहल अछि।
पछिला विधानसभा चुनावमे वाईएसआरसीपी १५१, टीडीपी २३ सीट जीतल छल जखन कि जन सेना एकटा सीट जीतल छल। २०१९ केर लोकसभा चुनावमे वाईएसआरसीपी २२ सीट जीतलक, जखन कि चन्द्रबाबूक पार्टी तीनटा लोकसभा सीट जितलक।
एहि चरणक प्रचारक क्रममे प्रधानमंत्री नरेन्द्र मोदीक नेतृत्वमे भाजपा नेतासभ राहुल गाँधीक निकट सहयोगी सैम पित्रोदाक भारतीयक विषयमे “नस्लीय” आ “त्वचाक रङ्ग” टिप्पणीकेँ लऽ कऽ कांग्रेसपर हमला कयलनि। ओ ‘इंडिया’ गठबन्धन दलपर “हिन्दू विरोधी” आ “लूट एवं तुष्टीकरण” मे लिप्त आ “वंशवादी राजनीति” मे लिप्त होयबाक आरोप लगओलनि।
पित्रोदा ओही दिन इंडियन ओवरसीज कांग्रेसक अध्यक्षक पदसँ इस्तीफा दऽ देलनि जहिया हुनकर बयानकेँ लऽ कऽ भाजपा द्वारा कांग्रेसकेँ घेरल गेल छल।
उत्तर प्रदेशक मुख्यमंत्री योगी आदित्यनाथ शनिदिन उत्तर प्रदेशक उन्नाव, कन्नौज आ कानपुरमे चुनावी रैलीकेँ सम्बोधित कयलनि, जखन कि सपा कन्नौज लोकसभा क्षेत्रमे जनसम्पर्क अभियान चलौलक।
उत्तर प्रदेशक कन्नौजमे सपा प्रमुख अखिलेश यादवक मुकाबला वर्तमान भाजपा सांसद सुब्रत पाठकसँ अछि, जखन कि उन्नावमे वर्तमान सांसद साक्षी महाराजक मुकाबला सपाक अनु टंडनसँ अछि।
कांग्रेस-इंडिया गठबंधनपर प्रहार करैत मोदी ५ मईकेँ कहलनि जे मुसलमान आब बुझि गेल छथि जे कांग्रेस आ ‘इंडिया’ गठबंधन ओकरा मोहराक रूपमे उपयोग कऽ रहल अछि, तेँ आब भाजपा द्वारा कयल गेल विकास कार्य देखि समुदाय हुनका (कांग्रेस-इंडाया गठबंधन) सँ दूरी बनाबय लागल अछि।
राहुल गांधी शुक्रदिन कहलनि जे उत्तर प्रदेशमे ‘इंडिया’ गठबंधनक आंधी आबि रहल अछि आ नरेन्द्र मोदी फेर प्रधानमंत्री नहिं बनताह।
मिथिला क्षेत्रीय बिहारमे बेगूसराय, उजियारपुर, दरभंगा, समस्तीपुर आ मुंगेर लोकसभा सीटक लेल सोमदिन मतदान होयत। एहि पाँच निर्वाचन क्षेत्रमेसँ तीनटा – बेगूसराय, उजियारपुर आ दरभंगा एखन भाजपाक कब्जामे अछि। दरभंगा आ मुंगेरमे राष्ट्रीय जनतांत्रिक गठबंधन (एनडीए)क सबसँ पैघ स्टार प्रचारक प्रधानमंत्री नरेन्द्र मोदीक अलग-अलग रैलीक बाद एनडीए एहि सीट सभकेँ जीतबाक लेल आशावादी अछि।
सभ राजनीतिक दलक नेता श्रीनगर लोकसभा सीटपर मतदाताकेँ लुभाबयकेँ प्रयास कयलनि। नेशनल कॉन्फ्रेंस शिया नेता गा सैयद रुहुल्ला मेहदीकेँ मैदानमे उतारने अछि जखन कि पीपुल्स डेमोक्रेटिक पार्टी (पीडीपी) केर युवा नेता वहीद पारा छथि। अपनी पार्टी अशरफ मीरकेँ अपन उम्मीदवार बनौलक अछि।
आम चुनावक अगिला तीन चरण २० मई, २५ मई आ १ जूनकेँ होयत। वोटक गिनती ४ जूनकेँ होएत।
