कर्नाटकक एकटा विशेष अदालत द्वारा बलात्कारक मामिलामे दोषी ठहरायल गेल जनता दल सेक्युलर (जदस) केर नेता आ पूर्व सांसद प्रज्वल रेवन्नाकें आजीवन कारावासक सजा सुनेलक अछि।
जनतबक अनुसार विशेष न्यायालयक न्यायाधीश संतोष गजानन भट्ट सजाक घोषणा कयलनि। पूर्व सांसद प्रज्वल रेवन्नाकें खिलाफ बलात्कारक चारिटा मामिला दर्ज अछि। ई मामिला हसन जिलाक रेवन्नाक परिवारक गन्निकाडा फार्महाउसमे घरेलू मददिक काज करय वाली 48 वर्षीय महिलासॅं जुड़ल अछि।
पूर्व प्रधानमंत्री एचडी देवेगौड़ाक पोता रेवन्नाकें 2021 मे हसनक अपन फार्महाउस आओर बेंगलुरुक हुनक घरमे दू बेर महिलाक संग बलात्कारक दोषी पाओल गेल छल। ई काज ओ अपन मोबाइल फोन पर सेहो रिकॉर्ड कयलनि। संगहि धमकी देलनि जे जौं ओ एहि बारेमे ककरो बतेतीह तॅं ओ वीडियो लीक कय देब।
विशेष लोक अभियोजक अशोक नायक कहलनि जे, अभियोजन पक्ष 26 गवाहसॅं बयान लेलक आ 180 दस्तावेज जमा कयलक। मुख्य प्रमाण पीड़िताक छल जे बहुत विश्वसनीय छल। मामिलाक जांच करय वला विशेष जांच टीम सितंबर 2024 मे 1632 पन्नाक चार्जशीट दायर केलक। एहिमे 113 गवाहक बयान शामिल छल।
ई मामिला तखन सामने आएल जखनि 26 अप्रैल, 2024 केँ हसनमे होबय वला लोकसभा चुनावसॅं पहिने कथित तौर पर प्रज्वल रेवन्नासॅं जुड़ल कथित अश्लील वीडियो वला पेन-ड्राइव पसारि देल गेल।
रेवन्नाकें पिछला साल ३१ मईकें जर्मनीसॅं बेंगलुरु हवाई अड्डा पर पहुँचला पर होलेनरसीपुरा टाउन थानामे दर्ज मामिलाक सिलसिलामे एसआईटी गिरफ्तार कय लेलक। रेवन्ना 2024 केर लोकसभा चुनावमे हसन संसदीय क्षेत्र जीतयमे असफल भऽ गेल छल। जद (एस) हुनका पर दायर केसक बाद पार्टीसॅं निलंबित कय देने छल।
