घटना

पूर्व राज्यपाल सत्यपाल मलिक आरएमएल अस्पतालमे लेलनि अंतिम सांस

नई दिल्ली
*

जम्मू-कश्मीरक पूर्व राज्यपाल सत्यपाल मलिकक निधन भऽ गेलनि। काल्हि यानी मंगलदिन दिल्लीक आरएमएल अस्पतालमे ओ अंतिम साँस लेलनि।

पूर्व राज्यपाल सत्यपाल मलिक बहुत दिनसँ बीमार छलाह। काल्हि यानि 5 अगस्तकेँ आरएमएल अस्पतालमे ओअंतिम साँस लेलनि। हुनकर उम्र 78 साल छल।

एहिसँ पहिने ओ भाजपाक मजबूत नेता छलाह। बादमे ओ एकर आलोचक बनि गेलाह। सत्यपाल मलिक मई 2025 सँ दिल्लीक डॉ. राम मनोहर लोहिया अस्पतालमे भर्ती छलाह, जतय हुनकर हालत गंभीर बनल रहल। हुनक निधनक कारण देशमे शोकक लहरि अछि।

बताओल गेल जे सत्यपाल मलिककेँ गंभीर मूत्रमार्ग संक्रमण आ किडनी फेल होयबाक जटिलताक कारण आईसीयूमे राखल गेल छल। काल्हि दुपहरमे अस्पताल सत्यपाल मलिकक निधनक जानकारी देलक।

जनतब दी जे एक दिन पहिने सोमकेँ झारखंडक पूर्व मुख्यमंत्री शिबू सोरेनक सेहो दिल्लीमे निधन भऽ गेल छल। शिबू सोरेन सोमदिन दिल्लीक सर गंगाराम अस्पतालमे अंतिम सांस लेलनि। काल्हि ओ पंचतत्वमे विलीन भऽ गेलाह।

सत्यपाल मलिकक जन्म 24 जुलाई 1946 केँ भेल छल। ओ उत्तर प्रदेशक बागपत जिलाक हिसवाड़ा गामक निवासी छलाह। हुनकर जन्म जाट परिवारमे भेल छल। मेरठ कॉलेजसँ विज्ञानमे स्नातक आ एलएलबीकेँ डिग्री प्राप्त करलनि। 1968-69 मे मेरठ कॉलेजक छात्रसंघक अध्यक्षक रूपमे अपन राजनीतिक जीवनक शुरुआत कयलनि। 1974-77 धरि उत्तर प्रदेश विधान सभाक सदस्य रहलाह आओर 1980 सँ 1989 तक राज्यसभामे उत्तर प्रदेशक प्रतिनिधित्व कयलनि।1989 सँ 1991धरि जनता दलक सदस्यक रूपमे अलीगढ़सँ नवम लोकसभाक सदस्य बनलाह।

Spread the love