कांग्रेसक पूर्व मधुबनी जिलाध्यक्ष सह प्रदेश प्रतिनिधि प्रो शीतलांबर झा एकटा प्रेस विज्ञप्ति जारी कऽ कहलनि अछि कि मिथिलाक पावन भूमि मधुबनी जिलाक झंझारपुर अनुमंडल अन्तर्गत विंदेश्वर स्थानमे देशक प्रधानमंत्री श्री नरेंद्र मोदी जी 24 अप्रैलकेँ पंचायती राज दिवस पर त्रिस्तरीय पंचायत प्रतिनिधि केर सम्मेलनकेँ संबोधित करय लेल आबि रहल छथि, जकरा हम स्वागत करैत छी।
प्रो. झा कहलनि, ई सरकारी कार्यक्रम अछि, मुदा चुनावी वर्षमे जाहि तरहसँ सरकारी संसाधनसँ डबल इंजनक नेता आ मंत्रीसभ द्वारा त्रिस्तरीय पंचायत प्रतिनिधि केर सम्मेलनकेँ आगामी विधानसभा चुनावक रूपमे प्रचार-प्रसार कऽ रहल छथि, ओकर हम घोर निंदा करैत छी।
ओ कहलनि, सूत्रसँ जानकारी भेटल अछि कि ई कार्यक्रम लेल आठ सौ करोड़ रुपया खर्च भऽ रहल अछि। प्रधानमंत्रीजी केर कार्यक्रम लेल पाँच सौ एकड़ जमीनमे तैयारी कयल जा रहल अछि, जाहिमे सभा स्थल, हेलिपैड आ पार्किंग कयल जायत। ई सभ जमीन विंदेश्वर स्थान आ भैरव स्थानक किसान-मजदूर लोकनिक अछि, जाहिमे फसल छल, जाहि फसल केर बर्बाद कऽ देल गेल अछि, जमीनक आरि केर तोड़ि कऽ समतल कऽ देल गेल अछि किसान लोक चिंतित छथि। हुनका नहिं तऽ फसलक क्षति भेटबाक भरोसा अछि आ नहि जमीनक सीमांकन कऽ फेरसँ हुनका हस्तगत भऽ सकत तकर भरोस, आ ई चिंता हुनका सभकेँ सता रहल अछि। सरकारी अमलाक आगू किसान मजदूर असहाय महसूस कऽ रहल छथि। कार्यक्रमक बाद की कियो जवाबदेही लेत।
प्रो झा आगू कहलनि, की प्रधानमंत्री जी त्रिस्तरीय पंचायत प्रतिनिधि सभकेँ जे अधिकार पूर्वसँ भेटल छल आ जकरा डबल इंजनक सरकार द्वारा छीनि लेल गेल अछि, ओकरा वापस करेताह ? स्व राजीव गांधी जी 73म संविधान संशोधन कऽ त्रिस्तरीय पंचायत प्रतिनिधिकेँ संपूर्ण अधिकार सौंपने छलथि, जे आइ बिहार सरकार द्वारा पंगु बना देल गेल अछि।
प्रो झा आगू कहला जे प्रधानमंत्री मोदी जी 2014 केर चुनावक समय मधुबनी आएल रहथि, ओतहि कतेक बड़का-बड़का घोषणा भेल छल। मधुबनी आ मिथिलाक सभ उद्योग बंद अछि। चीनी मिल सेहो आइ बंद पड़ल अछि, बल्कि बेचि देल गेल अछि। पंडौलक सुता फैक्ट्री, गुलकोज फैक्ट्री सभ समाप्त भ’ गेल अछि। लोक रोजगारक लेल पलायन कय रहल छथि। की प्रधानमंत्रीजी बाढ़ि सुखाड़क स्थायी निदानक आदेश एहि बेर देथिन्ह, की जिलामे केंद्रीय विद्यालय, आईआईटी, आईआईएम एहेन संस्थान मधुबनी केर भेटत ? की गरीब सभकेँ रोजगार देबय बला संस्था विश्व प्रसिद्ध मधुबनी खादी केर दिन घुरत, की रेलवे केर विस्तार होयत, मधुबनीसँ माता सीता जी केर नगरी सीतामढ़ी तक नव रेल लाइन बनत, जयनगरसँ देशक सभ महानगर तक प्रतिदिन रेलगाड़ी चलत, मिथिलाक विश्व प्रसिद्ध मखान उद्योगक केन्द्र मधुबनीमे होयत, की मधुबनीमे केंद्रीय पुस्तकालयक निर्माण होयत, की मधुबनी आ मिथिलाक दर्शनीय तीर्थस्थल केर केंद्रीय पर्यटक स्थलक रूपमे विकसित कयल जायत ?
प्रो झा कहलनि कि एहि कार्यक्रममे प्रधानमंत्री जी केर संग मुख्यमंत्री नीतीश कुमारक सेहो कार्यक्रम अछि, की झंझारपुर जिला बनत, की राजनगर केर रामपट्टी, बेनीपट्टी केर अरेर आ मधेपुर केर भेजाकेँ प्रखंड बनाओल जायत।
प्रो झा अंतमे डबल इंजनक नेता, मंत्री, सांसद आ विधायक सभसँ पुछलनि जे, की कारण अछि जे प्रधानमंत्री जी, वित्त मंत्री जी, मुख्यमंत्री जी सभक कार्यक्रम झंझारेपुरमे भऽ रहल अछि, की आब जिला मधुबनी नहि रहि गेल आ तें जिलाक लेल मेडिकल कॉलेज, पॉलिटेक्निक कॉलेज, मिथिला हाट सहित सब महत्वपूर्ण संस्था मधुबनी वा ओकर अगल-बगल नहि भऽ कऽ झंझारपुर चलि गेल। बीजेपी केर सांसद विधायक एवं विधान परिषदक सदस्यकेँ एहि सभक जबाब जनताकेँ देबय पड़त।