नवगठित दिल्ली विधानसभाक सत्र शुरू होयबासँ एक दिन पहिने रविदिन आम आदमी पार्टी (आप) विधायक दलक एकटा महत्वपूर्ण बैसार भेल, जाहिमे पूर्व मुख्यमंत्री आतिशी विधायक दलक नेता चुनल गेलीह। कालकाजी सीटसँ विधायक बनल आतिशी आब विधानसभामे प्रतिपक्षक नेताक भूमिका निभौतिह। खबरि अछि जे आतिशीकेँ सर्वसम्मतिसँ विधायक दलक नेता चुनल गेल।
दिल्ली विधानसभाक तीन दिवसीय विशेष सत्र २४ फरवरीसँ २७ फरवरी धरि चलत। महाशिवरात्रिक अवसर पर २६ फरवरीकेँ छुट्टी रहत। एहि सत्रक सम्बन्धमे पार्टीक विधायक दलक बैसारमे कतेको महत्वपूर्ण मुद्दा पर चर्चा कयल गेल। बैसारमे दिल्लीक पूर्व मुख्यमंत्री आ आम आदमी पार्टीक राष्ट्रीय संयोजक अरविन्द केजरीवालक संग पार्टीक अन्य वरिष्ठ नेता उपस्थित छलाह। बैसारक दौरान सत्रक कार्यसूची पर विस्तारसँ चर्चा कयल गेल।
आम आदमी पार्टीक वरिष्ठ नेता गोपाल राय बैसारक बाद मीडियाकेँ कहलनि जे विधायक दलक आजुक बैसारमे सर्वसम्मतिसँ ई निर्णय लेल गेल जे आतिशी दिल्ली विधानसभामे प्रतिपक्षक नेता रहतीह। आतिशी चुनौतीपूर्ण समयमे मुख्यमंत्रीक रूपमे दिल्लीक जनताक सेवा कयने छथि। आब ओ रचनात्मक विपक्षक भूमिकामे ‘आप’क प्रतिनिधित्व करतीह।
आतिशी एहि दायित्वक लेल अरविन्द केजरीवाल आ विधायक दलक प्रति आभार व्यक्त कयलनि। ओ कहलनि जे दिल्लीक जनता हमरा सभकेँ चुनावमे विपक्षक भूमिका देलक अछि। आम आदमी पार्टी विधानसभामे जनताक आवाज उठयबाक अपन दायित्व पूर्ण रूपसँ पूरा करत।
पूर्व मुख्यमंत्री कहलनि जे भारतीय जनता पार्टी दिल्लीक जनतासँ कतेको वादा कयलक जकर आधारपर ओ चुनल गेल। आब विपक्षकेँ रूपमे ई सुनिश्चित करब हमर जिम्मेदारी होयत जे आम आदमी पार्टी विपक्षमे रहला पर भारतीय जनता पार्टी द्वारा कयल गेल वादा पूरा होय।
ओ कहलनि जे दूटा मुख्य एजेंडा अछि। पहिल अछि भारतीय जनता पार्टी द्वारा कयल गेल वादाकेँ पूरा करबाक लेल सरकार पर दबाव बनेनाइ। दोसर ई सुनिश्चित करब अछि जे पूर्ववर्ती अरविन्द केजरीवाल सरकार द्वारा कयल गेल काज वर्तमान सरकार द्वारा नहि रोकल जाय। आतिशी उल्लेख कयलनि जे हालहिमे स्वास्थ्य मंत्री कहलनि जे बहुत रास मोहल्ला क्लीनिक बन्द कऽ देल जायत। जँ एहेन बात होइत अछि तँ हम दिल्लीवासीक अधिकारक लेल विधानसभाक भीतर आ सड़कपर लड़ब। प्रधानमंत्री मोदी स्वयं वादा कयलनि जे दिल्लीक पहिल कैबिनेट बैसारमे महिलासभकेँ दू हजार पाँच सय रुपया महीना उपलब्ध करयबाक निर्णय लेल जायत, आ पहिल किस्त ८ मार्चकेँ आओत। आतिशी कहलनि जे मंत्रिमंडलक पहिल बैसार भेल अछि, मुदा महिलाक लेल ई योजना पारित नहि भेल अछि। विपक्षक रूपमे भारतीय जनता पार्टीकेँ जवाबदेह बनाबय केर जिम्मेदारी हमर होएत।
कैगक रिपोर्टक सम्बन्धमे आतिशी कहलनि जे मुख्यमंत्रीक रूपमे अपन कार्यकालमे ओ ई रिपोर्ट विधानसभा अध्यक्षकेँ पठौने छलीह। ई रिपोर्ट सदनक समक्ष प्रस्तुत करबाक छल। एहि लेल भारतीय जनता पार्टीक लेल एकर श्रेय लेब उचित नहि अछि।
हालमे संपन्न दिल्ली विधानसभा चुनावमे जीतल सभटा ७० नवनिर्वाचित विधायक २४ फरवरीसँ शुरू होबयवला दिल्ली विधानसभाक पहिल सत्रमे सदस्यक रूपमे शपथ लेत। ई सत्र २४ फरवरी सँ २७ फरवरी धरि चलत। तीन दिवसीय सत्रमे विधायकसभक शपथग्रहणक बाद विधानसभा अध्यक्ष आ उपाध्यक्षक चुनाव सेहो होयत।
नव दिल्ली विधानसभाक पहिल सत्र आई (२४ फरवरी) सोमसँ भोर ११ बजे शुरू होयत। एहि अवधिमे नवनिर्वाचित विधायकसभकेँ प्रोटेम स्पीकर अरविंदर सिंह लवली शपथ दियेताह। दिल्लीक उपराज्यपाल वी.के. सक्सेनाक निर्देश पर लवलीकेँ प्रोटेम स्पीकर नियुक्त कयल गेल अछि। जाबत धरि विधानसभा अध्यक्ष आ उपाध्यक्षक चुनाव नहि भऽ जायत ताबत धरि ओ प्रोटेम स्पीकरक रूपमे सदनक संचालन करबाक लेल उत्तरदायी रहताह। विधानसभा अध्यक्षक चुनाव सोमदिन दुपहरिया २ बजे होयत।
काल्हि (२५ फरवरीकेँ) उपराज्यपाल वी.के. सक्सेनाक भाषण होयत। एकर बाद सीएजी रिपोर्ट विधानसभा फ्लोर पर प्रस्तुत कयल जायत। मुख्यमंत्री रेखा गुप्ता एलजीक भाषण पर धन्यवाद ज्ञापन करतीह। सत्रक अंतिम दिन २७ फरवरीकेँ सदनमे उपराज्यपालक भाषणक सम्बन्धमे धन्यवाद ज्ञापन पर चर्चा होयत। ओकर बाद विधानसभाक उपाध्यक्षक चुनाव होयत।
