दरभंगा आ कोसी प्रमंडलक सीमा पर स्थित मधुबनी जिलाक भगता गामक लोक दहशतमे अछि। गामक लोकक कहब छनि जे तेंदुआ हुनक गाममे घूमि रहल अछि। आवासीय क्षेत्रमे तेंदुआ देखलाक बाद गामक लोक दहशतमे अछि। मधेपुर ब्लॉकक भेजा थाना अन्तर्गत कोसी दियारा क्षेत्रक भगता गामसँ लोक उत्तर बधारमे एकटा तेंदुआ देखबाक दावा कयलक अछि। जहिना गाममे तेंदुआक समाचार पसरल, पूरा क्षेत्रमे हलचल मचि गेल अछि। वन विभागकेँ एहि बारेमे जानकारी देल गेल अछि। विभागक टीम इलाका पहुँचि गेल अछि आ जाँच कऽ रहल अछि। एहि घटनाक संबंधमे प्राप्त जानकारीक अनुसार, बुधदिन भोरमे गामक लोक बधारमे तेंदुआकेँ घूमैत देखलक। एकर बाद पूरा गाममे हलचल मचि गेल। लोक घबरा गेल आ जानवरकेँ बधार दिस भेजनाइ बंद कए देलक। गाममे तेंदुआक उपस्थितिक सूचना तत्काल स्थानीय पुलिस थानाक माध्यमसँ वन विभागकेँ देल गेल। सूचना भेटलापर झंझारपुरसँ वन विभागक एकटा टीम कोसी दियारा क्षेत्र पहुँचल। उक्त स्थान पर पहुँचला पर ओ बधारसँ तेंदुआक पैरक निशान देखलनि। टीम जानवरक पैरक निशानक नमूना लेलक आ गहन जाँच कयलक। वनपाल कुमारी ज्योति कहलनि जे प्रथम दृष्टया जंगली जानवरक पदचिह्नसँ ई स्पष्ट नहिं होइत अछि जे ओ तेंदुआ अछि वा कोनो आन जंगली जानवर वा जंगली बिलाड़ि अछि। ओ स्थानीय लोकसभकेँ सतर्क रहबाक लेल कहलनि अछि। वन विभागक अधिकारी जांचमे लागल छथि। एखन धरि तेंदुआक निशानदेह नहिं भेल अछि। बृहस्पति दिन भोरसँ वनकर्मी एक बेर फेर जाञ्चमे लागल छथि। लोकक कहब छनि जे जाबत धरि ई स्पष्ट नहिं भऽ जायत जे गामक लोक कोन जानवर देखलक, गामक लोकमे दहशत जारी रहत।
