राष्ट्रीय जनता दल चुनाव रणनीतिकार प्रशांत किशोरक जनसूरजसँ जुड़ल नेताक खिलाफ कार्रवाई कयलक अछि। पूर्व मुख्यमंत्री लालू प्रसाद यादवक पार्टी अपन पांच नेताक खिलाफ कारवाई कयलक अछि। हिनकासभ पर पार्टीक छवि खराब करबाक आरोप अछि। राजद हुनका सभकेँ छह सालक लेल निष्कासित कए देलक अछि। एहिमे कहलगाँवक पवन भारती, गोराडीहक मोहम्मद आफताब आलम, सन्हौलाक शिव कुमार साह, सुल्तानगंजक अजित कुमार आ आशा जायसवाल सम्मलित छथि। राजदक प्रदेश अध्यक्ष जगदानंद सिंह स्तरसँ ई कारवाई भेल अछि।
संगहि राजदमे एतेक पैघ स्तर पर नेताक निष्कासनक कार्यालय आदेश जारी भेलासँ राजद कार्यकर्तामे हलचल मचि गेल अछि। राजद कार्यालय द्वारा जारी आदेशमे लिखल गेल अछि जे अनुशासनक विपरीत जन सुराज संगठनमे शामिल भऽ कऽ पार्टी विरोधी काज कए रहल छथि, जाहिसँ पार्टीक छवि खराब भेल अछि। राजद जिला अध्यक्ष सीपी यादव कहलनि जे ई लोक राजद पार्टीमे रहैत जनसूरज पार्टीमे शामिल भऽ गेल छथि। एकर सूचीक प्रकाशनक सङ्ग ई पता चलल जे पार्टी विरोधी काजमे केसभ सम्मिलित अछि।
एहिसँ पहिने ई पत्र वायरल भेल छल जाहिमे जनसूरजकेँ भाजपाक बी टीम पर्यंत कहल गेल अछि।
राष्ट्रीय जनता दलक प्रदेश अध्यक्ष जगदानन्द सिंह पत्रमे लिखने छथि जे, “लगभग सभ जिलामे ई देखल गेल अछि जे हमर पार्टीक कार्यकर्ता वा नेता जन सुराज पार्टीक सहयोगी वा सदस्य बनि रहल छथि। ई चिन्ताक विषय अछि। जनसुराज पार्टी एकटा राजनीतिक दल अछि। एकर संस्थापक प्रशांत किशोर उर्फ प्रशांत किशोर पाण्डेय छथि। एहि पार्टीक संचालन आ वित्तपोषण भारतीय जनता पार्टी आ देशक धार्मिक लोक अर्थात भारतीय जनता पार्टीक बी टीम द्वारा कयल जाइत अछि। अहाँ सभ मित्र सभसँ निवेदन अछि जे एहन लोक द्वारा गुमराह नहिं होउ। हुनकर इरादा राष्ट्रीय जनता दलकेँ कमजोर करब आ भाजपाक शक्तिकेँ बढ़ायब अछि। जे मित्र सामाजिक न्याय आ साम्प्रदायिक सद्भाव पर आदरणीय लालू प्रसाद आ बाबासाहेब डॉ. भीमराव अम्बेडकर, डॉ. राम मनोहर लोहिया, महात्मा गांधी, डॉ. पेरियार, महात्मा ज्योतिराव फुले, जननायक कर्पूरी ठाकुर आ लोकनायक जयप्रकाश नारायणक विचारसँ वास्ता रखने छथि, हुनका पार्टी विरोधी काज नहिं करबाक चाही, अन्यथा पार्टी हुनका खिलाफ उचित कारवाई करत।”
वर्तमानमे राजद प्रदेश अध्यक्ष जगदानंद सिंह द्वारा जारी ई पत्र राजद नेता आ हुनकर पार्टी कार्यकर्ताक बीच चर्चाक विषय बनि गेल अछि।
