ऑस्ट्रेलियाक सिडनीमे स्थित वेस्टफील्ड बाॅन्डी जंक्शन मॉलमे चाकूबाजी आ गोलीबारीक कारण हड़कंप मचि गेल। घटनास्थल पर पुलिसक अभियान चलि रहल अछि। एहि घटनामे पाँच गोटेक मृत्यु भऽ गेल आ कतेको लोक घायल भऽ गेल। यद्यपि, न्यू साउथ वेल्स पुलिस वेस्टफील्ड बाॅन्डी जंक्शन मॉल परिसरसँ जुड़ल घटना पर एकटा पोस्ट साझा कयलक। एहिमे कहल गेल अछि जे बाॅन्डी जंक्शनपर एकटा व्यक्ति द्वारा चाकूसँ हमला कयल गेल। शनिदिन साँझ ४ बजेसँ ठीक पहिने कतेको लोककेँ चाकू मारबाक खबरिक बाद आपातकालीन सेवा बजाओल गेल आ लोकसभसँ घटनास्थलसँ दूर रहबाक आग्रह कयल गेल अछि। एहि घटनाक संबंधमे पूछताछ चलि रहल अछि। पुलिस कहलक जे सिडनीमे चाकू मारयवाला एकटा व्यक्तिकेँ गोली मारि देल गेल अछि।
ओतय उपस्थित लोकक कहब छनि जे मॉलक भीतरसँ गोलीबारीक आवाज सुनल गेल। लोकसभ पर चाकूसँ हमला कएल गेल। एहि घटनामे पाँच गोटे मरि गेलाह। घटनाक बाद भीड़ दौड़ैत देखल गेल। घटनाक सूचना भेटैत पुलिसक कतेको वाहन आ एम्बुलेंस घटनास्थल पर पहुँचि गेल। एहि घटनासँ जुड़ल कतेको वीडियो सोशल मीडिया पर वायरल भऽ रहल अछि।
बाॅन्डी जंक्शन मॉलमे भेल घटना पर ऑस्ट्रेलियाक प्रधानमन्त्री एंथनी अल्बानीज कहलनि जे “ई एकटा दुखद घटना अछि। एहिमे कतेको हताहत होयबाक सूचना भेटल अछि। हम एहि घटनामे मारल गेल लोकक परिवारक प्रति अपन संवेदना व्यक्त करैत छी।”
