लखनौर प्रखंडक देवहीटोल ग्राममे कार्तिक कृष्ण प्रतिपदा शुक्रसँ पंचदिवसीय सपरिवार भोला-भवानी कऽ पूजन शुरु भेल।
लखनौर निवासी प्रसीद्ध पंडित संतोष झा आ यज्ञक यजमान पंडित ईश्वरनाथ मिश्रक वैदिक मंत्रोच्चारक संग शुक्रदिन प्रात: काल संकल्प संग ई महायज्ञ प्रारम्भ भेल। मैपुप्र समदियाकेँ पंडित कहलनि, “अहिमे महादेव, पार्वती, गणेशजी, कार्तिक, हनुमानजी आ शिवगणक प्रतिमाक षोढशोपचार पूजन विधिवत होयत। एकर संगहि प्रांगण स्थित बाबा देवेश्वरनाथक कामनालिंग पर रुद्राभिषेक माॅं पार्वती, संकटमोचन हनुमान ,दुर्गा माता मंदिर संग ग्रामदेवता मंदिरमे श्री दुर्गासप्तशतीक पाठ आ समस्त गामसँ आयल पार्थिव महादेवक पूजन एतय होयत।”
पूजा कमिटीक अध्यक्ष मठाधीस त्यागीबाबा पं.श्री अरुण मिश्र कऽ अनुसार एतय मनोरंजनक संग संग अनेको खाय पिबय केर बाजार संग मिना बाजार सोहो लागल अछि।
पूजा कमिटक सचिव सतिश चंद्र मिश्रक जनतबक अनुसार पहिले दिनसँ एतय भक्तराजक भिड़ उमरि पड़ल अछि। एतय आओल सब भक्तगणक भोलाभवानी मनोकामना पूर्ण करैत छथि।
एकर हवन संग पूर्णाहुती पाॅंचम दिन मंगलकेँ होयत। विसर्जन कार्यक्रम कार्तिक कृष्ण षष्ठी बुधकेँ होयत।
