भाजपा कार्यकर्ता मनोज सिंह नगर थानामे रोहिणी पर मुकदमा दर्ज करौलनि अछि। सारण लोकसभा क्षेत्रक बड़ा तेलपा बूथ नंबर ३१८, ३१९ पर भेल हंगामाक संबंधमे ई प्राथमिकी दर्ज कएल गेल अछि।
सारण लोकसभा सीटसँ राजद उम्मीदवार आ लालू प्रसाद यादवक बेटी रोहिणी आचार्यक खिलाफ मामिला दर्ज कयल गेल अछि। भाजपा कार्यकर्ता मनोज सिंह नगर थानामे रोहिणी पर मुकदमा दर्ज करौलनि अछि। सारण लोकसभा क्षेत्रक बड़ा तेलपा बूथ नंबर ३१८, ३१९ पर भेल हंगामाक संबंधमे ई प्राथमिकी दर्ज कएल गेल अछि।
प्राप्त जानकारीक अनुसार छपरा नगर थानामे केस नंबर ३४९/२०२३ दर्ज कयल गेल अछि। रोहिणीक खिलाफ धारा ३०७,१७१सी,१८८,आरओपी एक्टक तहत मामिला दर्ज कयल गेल अछि। ई सबटा गैर जमानत योग्य धारा अछि। एहि मामिलामे रोहिणीक समस्या बढ़ि सकैत अछि। मामिला दर्ज करेलाक बाद पुलिस मामिलाक जांच कऽ रहल अछि।
रोहिणी आचार्य सोमदिन मतदानक दौरान सारण लोकसभा क्षेत्रक बड़ा तेलपा बूथ नंबर ३१८, ३१९ पहुंचल छलीह। एहि दौरान भाजपा पोलिंग एजेंट हुनकर विरोध कयलक। एहि दौरान भाजपा आ राजद कार्यकर्ताक बीच बकझक, गारि-गरौबलि आ पथराव भेल। ओही मामिलामे अगिला दिन मंगलदिन भोरमे फेर भाजपा आ राजदक कथित समर्थकक दू समूहक बीच विवाद भऽ गेल आ एहि दौरान गोली सेहो चलल। एकटा राजद समर्थकक मौत भऽ गेल, जखनि कि दू गोटे घायल भऽ गेलाह। आरोप अछि जे रोहिणी आचार्यकेँ भाजपा कार्यकर्ता गारि पढ़लक। एहि बात पर राजद आ भाजपाक कार्यकर्ता आमने-सामने आबि गेलाह।
छपरामे भेल हंगामाक बाद जिलामे इंटरनेट सेहो बंद कय देल गेल अछि जाहिसँ कोनो तरहक अप्रिय घटना नहिं होबए। एहि इलाकामे भारी संख्यामे पुलिस बल तैनात कएल गेल अछि। सारण लोकसभा सीट पर राजद अध्यक्ष लालू प्रसादक बेटी रोहिणी आचार्य भाजपा सांसद राजीव प्रताप रूडीक खिलाफ चुनाव लड़ि रहल छथि। जखन कि रूडी एहि ठामसँ सांसद छथि तऽ रोहिणी पहिल बेर चुनाव लड़ि रहल छथि।
