बिहारमे कांग्रेस अध्यक्षक खिलाफ महाकुंभमे स्नान पर टिप्पणीक लेल एफआईआर

पटना समदिया
*

कांग्रेसक राष्ट्रीय अध्यक्ष मल्लिकार्जुन खड़गेक खिलाफ मुजफ्फरपुर कोर्टमे शिकायत दर्ज कराओल गेल अछि। ई मामिला मध्य प्रदेशमे कांग्रेसक वरिष्ठ नेता खड़गे द्वारा कुम्भ स्नानक विषयमे कथित रूपसँ देल गेल एकटा विवादास्पद बयानसँ सम्बन्धित अछि।

ई शिकायत स्थानीय अधिवक्ता सुधीर ओझा द्वारा दायर कयल गेल। अधिवक्ता ओझा खड़गे पर धार्मिक भावनाकेँ ठेस पहुँचयबाक आरोप लगओलनि। वादी सुधीर ओझा आरोप लगओलनि जे कांग्रेस अध्यक्ष राजनीतिक लाभक लेल सनातनी हिन्दूसभक भावनासँ खेललनि। शिकायतमे कहल गेल अछि जे मल्लिकार्जुन खड़गेक बयानसँ हिन्दू धार्मिक लोकक आस्थाकेँ ठेस पहुँचल अछि। एहि मामिलाक सुनवाई मुजफ्फरपुर कोर्टमे चलि रहल अछि। अदालत सुनवाईक अगिला तारीख 3 फरवरी, 2025 तय कयलक अछि।

अधिवक्ता सुधीर ओझा दावा कयलनि जे खड़गेक बयानसँ नहिं केवल धार्मिक भावनाकेँ ठेस पहुँचल अछि अपितु समाजमे धार्मिक असंतुलन उत्पन्न करबाक प्रयास सेहो कयल गेल अछि। शिकायतमे भारतीय दंड संहिता (आईपीसी)क विभिन्न धाराक हवाला देल गेल, जाहिमे धार्मिक भावनाकेँ आहत करब आ सार्वजनिक शान्ति भंग करयवला धारा सेहो शामिल छल।

एखनि धरि मल्लिकार्जुन खड़गे वा कांग्रेस पार्टी दिसिसँ एहि शिकायतक कोनो आधिकारिक प्रतिक्रिया नहि आयल अछि। सबहक नजरि एहि मामिलाक आगामी अदालती सुनवाई पर अछि।

कांग्रेस अध्यक्ष मल्लिकार्जुन खड़गे सोमदिन केंद्रीय गृह मंत्री अमित शाह द्वारा त्रिवेणी संगममे डुबकी लगेबाक निर्णय पर सवाल उठौलनि आ पूछलखिन कि गंगामे स्नान करबासँ की गरीबी खतम होयत ? ओ आरोप लगओलनि जे भाजपा नेता कैमराक लेल डुबकी लगेबाक लेल प्रतिस्पर्धा कऽ रहल छथि। महूमे ‘जय बापू, जय भीम, जय संविधान’ रैलीकेँ संबोधित करैत खड़गे कहलनि कि भाजपा नेता कैमरामे नीक लागय तक डुबकी लगाबैत छथि। ओना, ओ कहलनि जे ओ ककरो आस्थापर सवाल नहि उठा रहल छथि आ जँ हुनक बयानसँ ककरो ठेस पहुँचैत अछि तँ माफी मांगैत छथि।

खड़गे कहलनि, “मोदीक झूठा वादामे नहि पड़ू। की गंगामे डुबकी लगेलासँ गरीबी समाप्त होइत अछि ? की इ अहांकेँ पेट भरत? हम केकरो आस्था पर सवाल नहि उठाबए चाहैत छी। जँ कियो आहत भेल अछि तखन हम माफी मांगैत छी। जखनि बच्चा भूखसँ मरि रहल अछि, स्कूल नहि जा रहल अछि, मजदूरकेँ मजदूरी नहि भेटि रहल अछि, ई लोक हजारो रुपया खर्च कऽ गंगामे डुबकी लगेबाक प्रतिस्पर्धा कऽ रहल अछि।”

खड़गेक बयानसँ पहिने अमित शाह प्रयागराजमे महाकुम्भक दौरान त्रिवेणी संगममे स्नान कयलनि। हुनका संग उत्तर प्रदेशक मुख्यमंत्री योगी आदित्यनाथ सेहो छलाह। शाह संगम क्षेत्रमे शीर्ष साधु लोकनिक संग एकटा विशेष बैसार सेहो कयलनि।

खड़गे कहलनि जे ओ भगवानमे सेहो विश्वास करैत छथि, मुदा गरीबक नाम पर धर्मक प्रयोग करब गलत अछि। कांग्रेसक राष्ट्रीय अध्यक्ष मल्लिकार्जुन खड़गे कहलनि जे हम धर्मक नाम पर गरीबक शोषण बर्दाश्त नहि करब। ओ कहलनि जे वल्लभभाई पटेल आरएसएसकेँ बन्द करबाक आदेश देने छलाह, तैयो ओ जवाहरलाल नेहरू आ वल्लभभाई पटेलकेँ एक दोसराक विरुद्ध ठाढ़ कयलनि। जवाहरलाल नेहरू कहने छलाह जे हमरा सभकेँ मिलिकऽ ओहि भयानक समुदायकेँ नष्ट करबाक चाही जे हमर समयक सबसँ पैघ व्यक्ति (महात्मा गाँधी)क हत्या कयलक। आरएसएस आ भाजपा राष्ट्र विरोधी अछि। खड़गे इहो कहलनि जे आरएसएस-भाजपा देशद्रोही अछि। अगर हम गरीबी आ बेरोजगारीसँ मुक्ति पाबय चाहैत छी तऽ संविधानक रक्षा करय पड़त। ओ (आरएसएस-भाजपा) कहैत छथि जे प्रत्येक मस्जिदक नीचा शिवलिंग नहि भेटैत अछि, मुदा लोकसभकेँ एहेन करबाक लेल उकसाबैत रहैत अछि।

खड़गे कहलनि जे भारतीय संविधानक निर्माता बाबासाहेब डॉ. भीमराव अम्बेडकरक जन्म १४ अप्रैल १८९१ केँ महू (अम्बेडकर नगर) केर एहि भूमिमे भेल छल। एकटा व्यक्ति पूरा देश मे अछूत, दलित, आदिवासी, पिछड़ा वर्ग आ गरीबक अधिकार प्राप्त करबाक भरसक प्रयास कयने छल। जँ एकटा व्यक्ति ई सब कए सकैत अछि तखन अहां किएक नहि कए सकैत छी ? जँ अहाँ सभ अम्बेडकर जी जकाँ बनि जाएब तखन ई भाजपा सरकार डगमगा जाएत, हुनक ठेकानाक पता नहि चलत। राहुल गांधी अहांकेँ लेल लड़ि रहल छथि, ओ कन्याकुमारीसँ कश्मीर तक पदयात्रा केलनि। केकरा लेल ? अहाँक लेल!