दिल्लीक मुख्यमंत्री आ आम आदमी पार्टी (आप)क राष्ट्रीय संयोजक अरविन्द केजरीवालक समर्थनमे पाकिस्तानक इमरान खान सरकारमे मंत्री रहल फवाद चौधरी सोशल मीडिया प्लेटफॉर्म एक्सक माध्यमसँ उतरल तऽ हुनका केजरीवालक एहेन मूँहतोर उत्तर भेटल, जकर फवाद चौधरी कल्पना नहिं कयने होयत।
केजरीवाल सीधा फवाद चौधरीकेँ कहलनि जे पाकिस्तान आतंकवादक सबसँ पैघ प्रायोजक अछि आ लिखलनि, “पाकिस्तानमे स्थिति बहुत खराब अछि, अहाँ अपन देशक देखभाल करू।”
लोकसभा चुनावक छठम चरणक लेल दिल्लीक सातो निर्वाचन क्षेत्रमे मतदान चलि रहल अछि। दिल्लीक मुख्यमंत्री अरविन्द केजरीवाल आ हुनक परिवार सिविल लाइन्सक एकटा मतदान केन्द्रपर वोट देलनि। एकर बाद ओ सोशल मीडिया प्लेटफॉर्म एक्स पर फोटो साझा करैत लिखलनि, “हम आइ अपन पिता, पत्नी आ बच्चाक संग वोट देलहुँ। हमर मायक स्वास्थ्य बहूत खराब अछि। ओ नहि जा सकलीह। हम तानाशाही, बेरोजगारी आ महंगाईक खिलाफ वोट कयलहुँ। अहाँ सभ सेहो वोट देबए जरुर जाउ।”
अरविन्द केजरीवालक एहि पोस्टकेँ पुनः पोस्ट करैत फवाद चौधरी अपन प्रतिक्रिया देलनि। पाकिस्तान तहरीक-ए-इंसाफ (पीटीआई)क नेता आ पाकिस्तानक इमरान खान सरकारक पूर्व मंत्री फवाद चौधरी अरविंद केजरीवालक पोस्ट पर लिखलनि, “शान्ति आ सद्भाव घृणा आ उग्रवादक शक्तिकेँ पराजित करत।”
फवाद चौधरीक पोस्टपर प्रतिक्रिया दैत दिल्लीक मुख्यमंत्री अरविन्द केजरीवाल लिखलनि, “चौधरी साहब, हम आ हमर देशक जनता अपन मसलाकेँ सम्हारबामे पूर्ण रूपसँ सक्षम छी। अहाँक पोस्टक जरूरत नहिं अछि। एहि समय पाकिस्तानक स्थिति बहुत खराब अछि। अहां अपन देशकेँ संभारू।”
एहिसँ पहिने पीटीआई प्रमुख इमरान खानक निकट सहयोगी पाकिस्तानक पूर्व मंत्री फवाद चौधरी सोशल मीडिया प्लेटफॉर्म एक्स पर कांग्रेस सांसद राहुल गाँधीक समर्थन करैत एकटा वीडियो साझा कयने छलथि, जाहिमे राहुल गाँधी अयोध्यामे रामललाक प्राण-प्रतिष्ठा समारोहक जिक्र करैत प्रधानमंत्री मोदी आ भाजपा पर निशाना साधि रहल छलथि। फवाद चौधरी एहि विडियोकेँ एक्स पर रिपोस्ट करैत लिखने छल, “राहुल ऑन फायर।”
