डेढ़ वर्षसँ लापता पुत्रक प्रतीक्षामे पिता जोहि रहल बाट

दरभंगा
*

नदियामी (दरभंगा) निवासी शिवकुमार झा, विगत डेढ़ वर्षसँ अप्पन लापता पुत्र भावेश कुमार झा केर बाट जोहि रहल छथि। गुमशुदगीक मामिला अछि पूंजीपथरा, रायगढ़ (छत्तीसगढ़) केर, जतय भावेश नर्फ़ हीरो कंपनीमे कार्यरत छलथि। बाइस वर्षीय भावेश पछिले वर्ष २२ फरवरीसँ निपत्ता छथि।

अखबारकेँ, एहि संबंधमे जानकारी प्रदान करैत डॉ प्रमोद झा कहलनि कि, भावेश २२ फरवरी २०२३ केँ अप्पन कार्यस्थल पहुँचलाह, तदुपरांत कार्यस्थल पर किछु कर्मचारीक संग हुनक झगड़ा सेहो भेलनि, घायलावस्थामे हुनका अस्पताल पहुँचाओल गेल। एहि संबंधमे भावेशक परिजनकेँ कोनो तरहक जानकारी नहि देल गेल। पिता शिवकुमार झा, अप्पन पुत्रक तलाश लेल, हर तरहक प्रयास कएलनि, थाना – पुलिस सभ भेल, मुदा आई धरि हुनका भावेशक सन्दर्भमे कोनो जानकारी प्राप्त नहि भेलनि।

डॉ प्रमोदक अनुसार पुलिस प्रशासन द्वारा गोल-मोल जबाव देल गेल आ परिजनकेँ कोनो संतोषजनक उत्तर नहि द’ गुमराह करबाक प्रयास सेहो कएल गेल। लापता भावेशक पिता अपना स्तरसँ रायपुरसँ दिल्ली धरि गुहार लगौलनि मुदा एखन धरि हुनका कतौह न्याय नहि भेटलनि।