मधेपुरामे अपराधी एकटा किसानकेँ गोली मारि हत्या कऽ देलक अछि। हत्याक समाचार सुनि क्षेत्रमे सनसनी पसरि गेल। ई घटना पुरैनी थाना क्षेत्रक मकदमपुर पंचायतक छब्बू बासामे भेल अछि। बुधदिन भोरमे गहूमक फसिल देखबा लेल अपन खेतमे गेल किसानक मृत्यु भऽ गेल। मृतक किसानक पहिचान छब्बू बासाक निवासी बिन्देश्वरी यादवक पुत्र विकास यादवक रूपमे भेल अछि। अपराधी विकासक माथ आ कनपटीमे गोली मारि देलक, जाहिसँ हुनक मौकापर मृत्यु भऽ भेल।
घटनाक बाद परिवारसँ भेटल जानकारीक अनुसार हत्याक पाछाँ भूमि विवादक मामिला कहल जा रहल अछि।
घटनाक सूचना भेटैत परिवार विकासकेँ सामुदायिक स्वास्थ्य केन्द्र पुरैनी लऽ गेल, जतय चिकित्सक हुनका मृत घोषित कऽ देलनि। ओतहि पुरैनी पुलिस द्वारा शवकेँ पोस्टमार्टम लेल मधेपुरा जिला अस्पताल पठाओल गेल। एहि घटनाक बाद परिवारक कानि-कानि कs खराब हाल अछि।
पुलिस घटनास्थल पर पहुँचि मामिलाक जाँच शुरू कऽ देलक अछि। मृतकक भतीजा सनोज यादव कहलनि जे भोरे काका गहूमक खेत देखबा लेल गेल छलाह। ओही समय अज्ञात अपराधी सभ हुनका गोली मारि देलक। घरक लगपासमे खेलैत बच्चासभ द्वारा हत्याक सूचना देल गेल, जाबत धरि लगपासक लोक घटनास्थल पर पहुँचय, अपराधी गोली चला कऽ भागि गेल छल। गोली मारलाक बाद गामक लोकक मदतिसँ हुनका पुरैनी पीएससी लऽ जायल गेल, जतय चिकित्सक हुनका मृत घोषित कऽ देलनि। हत्याक कारण एखनि धरि पता नहि चलल अछि। एहि घटनाक बादसँ एहि क्षेत्रमे भयक माहौल अछि। एतय पुलिस दावा कऽ रहल अछि जे एहि मामलामे अपराधीसभकेँ जल्दिये गिरफ्तार कयल जायत।
