चर्चित आईपीएस अधिकारी शिवदीप लांडे देलनि आइजी पदसँ इस्तीफा

पटना
*

आईपीएस अधिकारी शिवदीप लांडे अपन पदसँ इस्तीफा दऽ देलनि अछि। ई जानकारी ओ स्वयं देने छथि। ओ ई खुलासा नहिं कयने छथि जे आब ओ की करताह, मुदा संकेत देलनि अछि जे ओ बिहारक लोकक सेवा करैत रहताह।

बिहारमे घूसखोर पुलिसकर्मीकेँ भेस बदलि गिरफ्तार करय वाला आईपीएस अधिकारी शिवदीप लांडे भारतीय पुलिस सेवासँ इस्तीफा दऽ देलनि अछि। वर्तमानमे ओ पूर्णियामे सहायकक रूपमे तैनात छलाह। शिवदीप लांडे अपराधक विरुद्ध कठोर कारवाईक लेल जानल जाइत छथि। आब शिवदीप लांडे अपन सेवा समाप्त करबाक घोषणा कयलनि अछि। ओ २००६ बैचक पुलिस अधिकारी छथि।

शिवदीप लांडे सोशल मीडिया प्लेटफॉर्म फेसबुक पर लिखलखिन जे “हमर प्रिय बिहार, पिछला १८ सालसँ सरकारी पद पर सेवा देलाक बाद आइ हम एहि पदसँ इस्तीफा दऽ देलहुं। एतेक साल हम बिहारकेँ अपन आ अपन परिवारसँ ऊपर मानलहुँ। सरकारी सेवकक रूपमे हमर कार्यकालमे जँ कोनो चूक भेल अछि तँ हम माफी मांगैत छी। हम आइ भारतीय पुलिस सेवा (आईपीएस) सँ इस्तीफा दऽ देने छी मुदा हम बिहारेमे रहब आ आगुओ बिहार हमर कर्मभूमि बनल रहत।

शिवदीप लांडे अपन खुफिया अभियानक लेल जानल जाइत छथि। एक बेर ओ एकटा इंस्पेक्टर (थाना प्रभारी) केँ भेष बदलि घूस लैत पकड़वनि। जानकारीक अनुसार लांडे पटनाक डाक बंगला चौराहा पर घूस मांगैत एकटा निरीक्षककेँ फिल्मी अंदाजमे पकड़ने छलाह। ओ एकटा टी-शर्ट पहिरने छलाह आ माथमे गमछा लपेटने थाना प्रभारीकेँ गिरफ्तार कयने छलथि, जखनि थाना प्रभारी स्वयं घूसक पाई लेबय लेल आयल छल। शिवदीप लांडेक वीडियो सेहो सोशल मीडिया पर खूब वायरल भेल छल।

महाराष्ट्रक रहनिहार लांडे तखनि चर्चामे अयलाह जखनि ओ रोहतास एसपीक रूपमे तैनात छलाह। ओ जिलामे संचालित अवैध पाथर क्रशर इकाइसभक विरुद्ध पैघ स्तर पर कारवाई शुरू कयने छलाह।ओ किछु राजनीतिक दिग्गजक स्वामित्ववला पाथर क्रशर इकाइसभक विरुद्ध सेहो कठोर कारवाई शुरू कयलनि। पटनाक सिटी एसपीक रूपमे काज करैत हुनका बेसी लोकप्रियता भेटल। मनचला सभक विरुद्ध हुनक कारवाईसँ लड़कीसभमे आत्मविश्वास उत्पन्न भेल, जे हुनका स्कूल आ कॉलेजमे जयबाक क्रममे अपन आपबीतीक विषयमे सन्देश पठबैत छल।