आईएएस अधिकारी केके पाठक अपन पदसँ इस्तीफा दऽ देलखिन। जनतब ई जे पद छोड़यसँ पहिने केके पाठक १६ जनवरी तकक छुट्टी पर चलि गेल छलाह। छुट्टी पर गेलाक बादसँ हुनकर पद छोड़बाक अटकलबाजी तेज भऽ गेल छल, जकर बाद आब ओ अपन पदसँ इस्तीफा दऽ देलनि अछि। केके पाठक शिक्षा विभागक कार्यभार सम्हारलाक बाद बहुत सख्त छलाह। केके पाठक विभाग आ सामान्य प्रशासन विभाग केर पत्र लिखि कए एकर जानकारी देलनि अछि। केके पाठक सरकारकेँ पठाओल अपन त्यागपत्रमे लिखने छथि जे हम स्वेच्छासँ एसीएसक पदसँ इस्तीफा दऽ रहल छी।
ई पत्र केके पाठक द्वारा ९ जनवरीकेँ सरकार यानी विभागकेँ देल गेल अछि, मुदा ई पत्र बृहस्पति कऽ वायरल भऽ गेल, जकर बाद हुनकर इस्तीफाक खबर सामने आयल। केके पाठकक गिनती बिहारक कठोर आ सक्षम अधिकारीमे होइत अछि। एहिसँ पहिने ओ बिहार सरकारक कतेको विभागमे काज कऽ चुकल छथि। केके पाठक द्वारा कयल गेल सुधारक लेल हुनकर आलोचना सेहो होइत रहल। शिक्षा विभागक प्रभार लेलाक बाद ओ कतेको सख्त नियम सेहो बनौने छलाह, जाहि कारण शिक्षक संगठन सेहो हुनकासँ बहुत नाराज छल। शिक्षक सभकेँ ज्वाइनिंग लेटर देबाक लेल ओ एही महिनाक १३ जनवरीकेँ पटनामे आयोजित कार्यक्रमसँ सेहो दूर रहल छलैथ।
