विलुप्त होइत माटि सौं बनल पारम्परिक मूर्तिकला कार्यशाला”क शुभारम्भ मंगल दिन पटना स्थित बुद्ध स्मृति पार्क संग्रहालयमे भेल। छः दिवसीय एहि कार्यशालाक आयोजन ‘इंटैक’, पटना द्वारा योर हेरिटेज संस्थाक सहयोगसौं कयल जा रहल अछि।
मिथिलाक सांस्कृतिक परम्पारक वाहक एवं विवाह संस्कारक अवसर पर उपयोगमे आबयवला माटिसौं बनल हाथी जनक डाला, ठक-बक, कोठी आदिक निर्माण सम्बन्धी आवश्यक जानकारी एवं प्रशिक्षण अगिला पीढ़ीकेँ देबाक उद्देश्यसौं आयोजित एहि कार्यशालाक उद्घाटन प्रख्यात पुराविद एवं बिहारक अनेक संग्रहालयक पूर्व निदेशक डॉ. उमेश चन्द्र द्विवेदी, बुद्ध स्मृति पार्क संग्रहालयक वर्त्तमान प्रभारी डॉ. शिव कुमार मिश्र, कला प्रोत्साहक श्रीमती गीता गुप्ता, सुविख्यात इतिहासकार एवं इंटैक बिहारक समन्वयक भैरव लाल दास, कलाकार एवं रिसोर्स पर्सन नीता कर्ण, निभा लाभ, अलका दास, संजना दास आदि द्वारा दीप प्रज्ज्वलित कऽ कयल गेल।
एहिमे, रचना प्रियदर्शी, तृप्ति रानी, अमृता शाम्भवी, नविता कुमारी समेत करीब 40-50 टा महिला प्रतिभागी भाग लऽ रहल छथि।
कलाकार सभकें प्रोत्साहित करबाक लेल एहि कार्यशालामे अनेक गणमान्य व्यक्ति सभक संग प्रख्यात व्यवसायी सुधीर गुप्ता, शिक्षाविद डॉ. विनय कर्ण, कल्पना कुमारी आदि उपस्थित छलथि।
