भारतीय विदेश मंत्री एस. जयशंकर जी-२० विदेश मन्त्रीसभक बैठक (एफएमएम)क अवसर पर सिंगापुर आ ब्राजीलक विदेश मन्त्रीसभक संग महत्वपूर्ण द्विपक्षीय वार्ता कयलनि। ई बैसार दक्षिण अफ्रीकाक जोहान्सबर्गमे भेल छल। जयशंकर सिंगापुरक विदेश मंत्री विवियन बालकृष्णनसँ भेंट कयलनि, जतय दुनू नेता आपसी सहयोग आ वैश्विक परिस्थिति पर चर्चा कयलनि।
जयशंकर एहि वार्तालापकेँ महत्वपूर्ण आ उपयोगी बतौलनि आ सोशल मीडिया प्लेटफॉर्म ‘एक्स’ पर कहलनि, “सिंगापुरक विदेश मंत्री विवियन बालकृष्णनसँ नीक बातचीत भेल। एहि बेर जोहान्सबर्गमे जी-२० बैसारमे हमसभ दुनियाक स्थिति आ आपसी सहयोगपर चर्चा कयलहुँ।”
तकर बाद, जयशंकर ब्राजीलक विदेश मंत्री मौरो विएरासँ सेहो भेंट कयलनि। चर्चा भारत-ब्राजील सम्बन्ध, वैश्विक मुद्दा आ ब्राजीलक ब्रिक्स अध्यक्षता पर केन्द्रित छल। जयशंकर एकरा बहुपक्षीय सहयोगकेँ मजबूत करबाक अवसर बतौलनि। ओ ‘एक्स’ पर लिखलनि, “आइ जोहान्सबर्गमे ब्राजीलक विदेश मंत्री मौरो विएरासँ भेंट कऽ प्रसन्नता भेल। हम द्विपक्षीय संबंध, वैश्विक विकास, जी-२० मे अपन भागीदारी आ ब्राजीलक ब्रिक्स अध्यक्षता पर चर्चा केलौं।”
जयशंकर दक्षिण अफ्रीकाक दू दिवसीय दौरा पर छथि। भारतीय विदेश मंत्रालय (एमईए)क अनुसार, एहि यात्राक उद्देश्य जी-२०मे भारतक भागीदारीकेँ मजबूत केनाइ आ ग्लोबल साउथक आवाजकेँ बढ़ावा देनाइ छैक।
जनतब जे दक्षिण अफ्रीका १ दिसंबर, २०२४ सँ जी-२० अध्यक्षता ग्रहण करत, जे नवम्बर २०२५ धरि चलत। एहि बैसारक मुख्य विषय अछि “एकजुटता, समानता, स्थिरता”। जी२० समूह, जाहिमे १९ प्रमुख देश, यूरोपीय संघ आ अफ्रीकी संघ सम्मिलित अछि, वैश्विक आर्थिक आ वित्तीय नीतिसभकेँ आकार देबामे महत्वपूर्ण भूमिका निभाबैत अछि।
