बिहारमे एग्जिट पोल ‘खर्चक तमाशा’, नहिं होयत सफल : मनोज झा

पटना
*

राजद प्रवक्ता आ राज्यसभा सांसद मनोज झा सोमदिन एक्जिट पोल केर ‘खर्चक तमाशा’ बतौलनि। ओ कहलनि जे १ जूनसँ देश एक्जिट पोलक रूपमे खर्चक तमाशा देखलक। एहि एक्जिट पोलक माध्यमसँ लोक लाख-करोड़क कमाई कयलक, इ हुनका मुबारक होउन। बिहारक मामिलामे एक्जिट पोल सफल होयबासँ बेसी विफल होइत अछि।

ओ मतगणनासँ पहिने डाक मतपत्रमे खेल नहिं करबाक चेतौनी देलनि आ कहलनि जे जँ एहन होइत अछि तँ बिहारक जनता एकर प्रतिकार करत। पटनामे आयोजित महागठबंधनक संयुक्त संवाददाता सम्मेलनकेँ संबोधित करैत ओ कहलनि कि हम चुनाव आयोगसँ भेंट कए चुकल छी। २०२०क विधानसभा चुनावमे डाक मतपत्रक सम्बन्धमे जे माहौल बनाओल गेल छल, ओ एहि बेर नहिं बनय। डाक मतपत्रमे खेल नहिं हेबाक चाही। पोस्टल बैलेटक गिनती होय आ ओकर समायोजन होय।

राजद नेता कहलनि जे दोसर चरणक मतगणना पहिल चरणक गिनतीक प्रक्रिया पूरा भेलाक बादे शुरू होय। दोसर चरणक गिनतीसँ पहिने पहिल चरणक मतगणनाक विषयमे उम्मीदवारकेँ सुनिश्चित कयल जयबाक चाही। एहि बेर जँ धोखाधड़ी भेल तऽ दिक्कत होएत। ओ कहलनि जे जँ एहि बेर खेल होयत तऽ जोरदार प्रतिरोध होयत। हम आ जनता एक्जिट पोलक मनोवैज्ञानिक ट्रिकमे नहिं फंसयवाला छी। मंगल सूत्र, मुजरा केर जनता ठुकरा देलक अछि। ओ दावा कयलनि जे महागठबंधन बिहारमे २५ सीट जीत रहल अछि।

सात चरणक मतदानक बाद विभिन्न एजेंसी एक्जिट पोलक परिणाम प्रस्तुत कयलक। एहिमे एनडीएकेँ भारी बढ़त देखाओल गेल अछि।