विदेश मंत्री एस. जयशंकर बृहस्पतिकेँ राज्यसभामे कहलनि जे अमेरिकासँ अवैध भारतीय प्रवासीकेँ निर्वासित करबाक प्रक्रिया नव नहि अछि, कतेको सालसँ चलि रहल अछि। विदेश मंत्री कहलनि जे जँ कियो अवैध रूपसँ विदेशमे रहैत पाओल जाइत अछि तँ ई प्रत्येक देशक जिम्मेदारी अछि जे ओ अपन नागरिककेँ वापिस लऽ जाय। ओ उल्लेख कयलनि जे हम अमेरिकी सरकारक संग बातचीत कऽ रहल छी जाहिसँ ई सुनिश्चित कयल जा सकय जे वापस आबयवला नागरिकक निर्वासनसँ जुड़ल कोनो दुर्व्यवहार नहि होय।
खबरि अछि जे १०४ अवैध भारतीय प्रवासीक पहिल खेपकेँ लऽ कऽ एकटा अमेरिकी सैन्य विमान बुधदिन पंजाबक अमृतसर पहुँचल। एहिमे सबसँ बेसी ३३-३३ हरियाणा आ गुजरातक अछि। कुल ३० निर्वासित पंजाबक निवासी अछि। अमेरिकी सेनाक सी-१७ विमान कड़ा सुरक्षाक बीच श्री गुरु राम दास जी अंतर्राष्ट्रीय हवाई अड्डा पर उतरल।
एहिमे उत्तर प्रदेश आ महाराष्ट्रसँ तीन-तीन आ चंडीगढ़सँ दूटा अछि। निर्वासित लोकमे २५ महिला आ १२ नाबालिग शामिल अछि, जाहिमे सबसँ छोट यात्री मात्र चारि वर्षक अछि। 48 लोक 25 सालसँ कम उम्रक अछि।
मंगलदिन टेक्साससँ उड़ान भरल एहि विमानमे चालक दलक ११ सदस्य आ ४५ अमेरिकी अधिकारी सेहो सवार छलाह जे निर्वासन प्रक्रियाक निगरानी करैत छलाह।
एकटा आंकड़ाक अनुसार, भारतसँ लगभग ७२५,००० अवैध प्रवासी अमेरिकामे रहैत छथि, जाहिसँ ई मेक्सिको आ अल सल्वाडोरक बाद अनधिकृत आप्रवासीसभक तेसर सबसँ पैघ जनसंख्यावला देश बनि गेल अछि।
