मानल जाइत अछि जे विधान परिषदक ११ सीटपर होबयवला चुनावमे क्रॉस वोटिंग निश्चित होयत। दू दिन पहिने कांग्रेस विधायक मुरारी गौतम आ सिद्धार्थ सौरभ आ राजद विधायक संगीता देवी भाजपामे शामिल भऽ गेलीह। एहिसँ पहिने सरकार बदललाक बाद शक्ति परीक्षणक दौरान राजदक तीनटा विधायक भाजपाक पक्षमे पहुँचल छलाह।
एमहर सत्तारूढ़ दलक नेता एखनि आओर विधायककेँ सङ्ग जुड़बाक दावा कऽ रहल छथि। एहन अंदाज लगायल जा रहल अछि जे अगिला मास होबयवला विधान परिषदक चुनावक दौरान बहुत रास विपक्षी विधायक सत्तारूढ़ दलक उम्मीदवारक पक्षमे मतदान कऽ सकैत छथि।
विधानसभामे संख्यात्मक अंकगणितक अनुसार कोनो विधायकक सदस्यता रद्द भेलाक बाद वर्तमानमे कुल विधायकक संख्या २४२ अछि। महागठबंधनक ६ विधायकक विद्रोहक बाद हुनका लग विधायकक संख्या घटि कऽ १०७ रहि गेल अछि।
विधान परिषदमे एकटा सीट जीतबाक लेल एकटा उम्मीदवारकेँ २२ विधायकक आवश्यकता होइत छैक। तदनुसार, ५ सीटक लेल ११० विधायकक आवश्यकता अछि। जँ किछु आओर विधायक पक्ष बदलैत छथि आ चुनाव होइत अछि तखन क्रॉस वोटिंगक खतरा भऽ जायत।
एतय जँ हम सत्तारूढ़ दलक दावाकेँ देखब तखन ई मानल जाइत अछि जे चुनावमे कोनो खेल होयत। बिहार विधान परिषदक ११ सीटमे एखन एनडीए लग आठ सीट अछि जाहि लेल २१ मार्चकेँ चुनाव होयत, जखन कि महागठबंधनक तीनटा सीट अछि।
विधान परिषद चुनावक अधिसूचना ४ मार्चकेँ जारी कयल जायत। नामांकन ११ मार्च तक दाखिल कएल जाएत। खाली सीट पर २१ मार्चकेँ मतदान होएत। परिणाम सेहो ओही दिन घोषित कएल जाएत। खाली पड़य वाला सीटमे भाजपाक मंगल पांडेय, शाहनवाज हुसैन आ संजय पासवानक तीन सीट अछि, जखन कि जेडीयू केर मुख्यमंत्री नीतीश कुमार, संजय झा, रामेश्वर महतो आ खालिद अनवरक चारि सीट अछि।
राजद लग दूटा सीट पूर्व मुख्यमंत्री राबड़ी देवी आ रामचंद्र पूर्वे केर अछि। कांग्रेसक प्रेम चन्द्र मिश्रा आ हिन्दुस्तानी अवाम मोर्चाक संतोष सुमनक एक-एक सीट अछि। संजय झा आब राज्यसभाक सदस्य बनि गेल छथि।
