जनतब जे मैथिल पुनर्जागरण प्रकाश (राष्ट्रीय मैथिली दैनिक) केर चारिम स्थापना दिवस समारोह विगत २६ दिसंबर २०२४ केँ मनाओल गेल अछि। एहि अवसर पर सतत सक्रिय रुपसँ सहभागिता लेल १६ गोटेकेँ अखबार ‘उत्कृष्ट सक्रिय प्रदर्शन सम्मान २०२५’ सँ सम्मानित कयलक अछि।
एहि परिप्रेक्ष्यमे संपादन सहयोगमे सतत सक्रिय सहभागिता लेल शोभा झा सेहो सम्मिलित छथि। स्थापना दिवस समारोहमे हुनक अनुपस्थिति रहल, फलतः गत दिवस हुनक पति कुमार प्रमोद चन्द्रकेँ मधुबनी प्रकाशन युनिटमे हुनक प्रतिनिधिक रुपमे एहि सम्मानक लेल मोमेंटो, मेडल, सम्मान पत्र आदिसँ प्रधान संपादक अजय नाथ झा शास्त्री द्वारा सम्मानित कयल गेल।
तहिना एहि परिप्रेक्ष्यमे अखबारक विधि सलाहकार एडवोकेट कन्हैयाजी सेहो सम्मिलित छथि। ‘मैथिल पुनर्जागरण प्रकाश (राष्ट्रीय मैथिली दैनिक)’ केर विधि सलाहकार एडवोकेट कन्हैयाजी समारोहमे उपस्थित नहिं भऽ सकल छलथि, काल्हि शुक्रकेँ हुनक उपस्थिति अखबारक मधुबनीक प्रकाशन युनिटमे भेल आ हुनका प्रधान संपादक अजय नाथ झा शास्त्री एहि सम्मानसँ सम्मानित करैत मोमेंटो, मेडल, सम्मान पत्र आदिसँ सम्मानित कयलनि।
