आबयवला समयमे देशमे इलेक्ट्रिक वाहन (ईवी)क चलन बढ़त। एहि कारणेँ अगिला दू सालमे ईवीक दाम पेट्रोल आ डीजल वाहनक बराबर आबि जायत। ई बयान केंद्रीय सड़क परिवहन आ राजमार्ग मंत्री नितिन गडकरी सोमदिन देलनि।
ऑटोमोटिव कम्पोनेंट मैन्युफैक्चरर्स एसोसिएशन ऑफ इंडिया (एसीएमए) द्वारा आयोजित एकटा कार्यक्रममे मंत्री ऑटोमोबाइल केर सड़क सुरक्षा बढ़यबामे बेसी योगदान देबाक लेल कहलनि।
गडकरी कहलनि, “दस साल पहिने जखन हम ऑटोमोबाइल कम्पनीसँ इलेक्ट्रिक वाहन केर संख्या बढ़ेबाक लेल कहने छलहुँ, तखनि बाजारमे कियो हमर बात केर बेसी महत्व नहिं देलक। आब ओ सभ कहि रहल छथि जे अवसर छूटि गेल अछि।”
ओ आगू कहलनि जे जँ वित्त मंत्रालय आ भारी उद्योग मंत्रालय ईवी सब्सिडी लेल धन आवंटित करैत अछि तखन ओ इलेक्ट्रिक वाहनक लेल कोनो तरहक सब्सिडी आ प्रोत्साहन आदिक विरुद्ध नहिं छथि।
नव इलेक्ट्रिक व्हीकल (ईवी) विनिर्माण नीतिक उद्देश्य वैश्विक प्लेयर्सकेँ घरेलू वैल्यू चेनमे योगदान देबाक लेल आकर्षित करब अछि।
नव ईवी नीतिक अन्तर्गत कम्पनीसभकेँ भारतमे विनिर्माण सुविधा स्थापित करबाक लेल आ तीन सालमे उत्पादन शुरू करबाक लेल कमसँ कम ४,१५० करोड़ टाका (५० करोड़ डॉलर) निवेश करय पड़त।
एहि अवधिमे कम्पनीकेँ कमसँ कम २५ प्रतिशत घरेलू मूल्य संवर्धन (डीएवीए) करय पड़त। संगहि कमसँ कम ५० प्रतिशत डीवीए पाँच सालक भीतर करय पड़त।
क्रेडिट रेटिंग एजेंसी आईसीआरए द्वारा पछिला मास जारी एकटा रिपोर्टमे कहल गेल अछि जे २०३० धरि नव कार बिक्रीमे इलेक्ट्रिक वाहनक हिस्सेदारी १५ प्रतिशत धरि पहुँचि सकैत अछि। वित्त वर्ष २३ केर तुलनामे वित्त वर्ष २४ मे ४२.०६ प्रतिशत नव कार पंजीकृत भेल छल।
