यूरोपीय संघ यूक्रेनक खिलाफ पूर्ण स्तर पर युद्ध छेड़बाक लेल रूसक खिलाफ १४म चरणक प्रतिबंधक तैयारी कऽ रहल अछि। संस्थाक एकटा वरिष्ठ अधिकारी शुक्रदिन ई जानकारी देलनि।
यूरोपीय संघक वरिष्ठ अधिकारी कहलनि जे नव प्रतिबंध पैकेजमे व्यक्ति आ संगठनसभ पर दंडात्मक उपाय शामिल छैक जे रूस पर यूरोपीय संघक विद्यमान प्रतिबंधकेँ रोकबाक प्रयासमे सहायता करत।
यूरोपीय संघक एकटा राजनयिक कहलनि जे दंडात्मक उपायमे तेल टैंकर वा “डार्क फ्लीट” पर विचार कयल जयबाक चाही, जे एहिमे बाधा डालय केर लेल विद्यमान प्रतिबंधक वावजूद रुसी तेलक परिवहन करैत अछि।
राजनयिकक अनुसार, नव व्यक्ति आ सङ्गठनकेँ ब्लॉकमे हुनक सम्पत्ति पर रोक लगाओल जायत। यूरोपीय आयोगकेँ आबयवला सप्ताहमे प्रतिबंधक प्रस्ताव प्रस्तुत करबाक अछि।
रूस पर प्रतिबंधक १३म पैकेज फरवरीमे यूक्रेनक विरुद्ध युद्धक दोसर वर्षगाँठपर अपनाओल गेल छल आ १०६ व्यक्ति आ ८८ सङ्गठनकेँ लक्षित कयल गेल छल। एहिमे उत्तर कोरिया द्वारा रूसकेँ हथियारक आपूर्तिमे शामिल व्यक्ति आ उत्तर कोरियाक रक्षा मंत्री शामिल छलाह। यूक्रेनक विरुद्ध रूसी युद्धमे योगदान देबयवला अर्थव्यवस्थाक विभिन्न वर्गकेँ लक्षित करैत यूरोपीय सङ्घक कतेको चरणक प्रतिबंधसँ रूस प्रभावित भेल अछि। एहिमे कच्चा तेल, कोयला, इस्पात, सोना आ विलासिता वस्तुसभ पर आयात प्रतिबन्धक सङ्ग-सङ्ग बैंक आ अन्य वित्तीय संस्थानक विरुद्ध दंडात्मक उपाय सम्मिलित अछि। एकर अतिरिक्त, तथाकथित “दोहरा उपयोगक वस्तु” पर व्यापार प्रतिबंध लगा देल गेल छल जे रूसी रक्षा आ सुरक्षा क्षेत्रक तकनीकी विकासमे योगदान दऽ सकैत छैक। यूरोपीय संघमे जमल रूसी केन्द्रीय बैंकक निधिकेँ सुरक्षित करबासँ प्राप्त लाभक एकटा पैघ हिस्साक उपयोग यूक्रेनक लेल सैन्य उपकरण किनबाक योजनापर काज जारी अछि।
