प्रधानमंत्री नरेंद्र मोदी काल्हि शनिकेँ 15म रोजगार मेला कार्यक्रममे 51,236 नव-नियुक्त कर्मचारी सभकेँ नियुक्ति पत्र वितरित कएलनि। ई कार्यक्रम वीडियो कांफ्रेंसिंगक माध्यमसँ आयोजित भेल, जाहिमे देशभरिक 47 केन्द्रसँ जुड़ल रहला।
पीएम मोदी नव कर्मचारीकेँ बधाई दैत कहलनि कि आब ओ भारतक अर्थव्यवस्था, इंफ्रास्ट्रक्चर, आंतरिक सुरक्षा आ सामाजिक कल्याणकेँ मजबूत बनाबइमे महत्वपूर्ण भूमिका निभाएत। ओ कहलनि, “अहाँक लगन जतेक अधिक हेतै, हम ओतेक जल्दी विकसित भारतक तरफ बढ़ब।”
ओ युवासँ कहलनि, युवा शक्ति जखनि देशक विकासमे भागीदार बनैत छथि, तखनि तेजीसँ तरक्की होइत अछि। ओ ‘स्किल इंडिया’, ‘स्टार्टअप इंडिया’ आ ‘डिजिटल इंडिया’ जेकाँ सरकारी योजनाक उल्लेख करैत कहलनि जे ई पहल नवाचार, स्वरोजगार आ तकनीकी नेतृत्वकेँ बढ़ावा देलक अछि। डिजिटल क्रांतिमे भारतक उपलब्धि केर उजागर करैत पीएम मोदी यूपीआई, ओएनडीसी आ जेम जेकाँ पहलक उदाहरण दैत आ एहीमे युवाक मेहनतिक श्रेय देलनि। प्रधानमंत्री 2025-26 केर केंद्रीय बजटमे घोषित ‘मैन्युफैक्चरिंग मिशन’ केर सेहो चर्चा कएलन्हि, जे ‘मेक इन इंडिया’ अभियानकेँ गति देत आ युवा उद्यमीकें वैश्विक प्रतिस्पर्धासँ भरल उत्पाद बनेबामे प्रेरित करत। ओ कहलनि जे ऑटोमोबाइल, फुटवियर, खादी आ कुटीर उद्योग जेकाँ क्षेत्रमे रिकॉर्ड वृद्धि दर्ज कएल गेल अछि आ खादीक कारोबार आब 1.7 लाख करोड़ रुपयासँ बेसी होइत अछि।
इन्फ्रास्ट्रक्चर विकास पर बात करैत पीएम मोदी कहलनि जे जलमार्ग सभक माध्यमसँ माल ढुलाई 2014 मे 18 मिलियन टनसँ बढ़ि कऽ आइ 145 मिलियन टन भऽ गेल अछि आ राष्ट्रीय जलमार्गक संख्या 5 सँ बढ़ि कऽ 110 भऽ गेल अछि, जे लगभग 5,000 किलोमीटर क्षेत्रमे पसरल अछि।
पीएम मोदी मुम्बईमे 2025 मे होमय बला ‘वर्ल्ड ऑडियो विजुअल एंड एंटरटेनमेंट समिट’ – 2025 केर उल्लेख कएलनि। ओ कहलनि जे ई आयोजन एआई आ नव मीडिया क्षेत्रमे युवाक लेल नव अवसर खोलत आ एकरा तहत वर्कशॉप सभ सेहो आयोजित कयल जायत। महिलाक बढ़ल भागीदारीक सराहना कऽ पीएम मोदी हालक यूपीएससी परीक्षा परिणामक उल्लेख कएलनि, जाहिमे शीर्ष दू स्थान महिलाक द्वारा प्राप्त कएल गेल। ओ कहला जे आजुक युवा समावेशिताक प्रतीक बनि गेल अछि। प्रधानमंत्री युवा संग ‘एक पेड़ मां केर नाम’ अभियानमे शामिल होइत अपन मां केर सम्मानमे एकटा पौधा लगाबयक अपील सेहो कएलनि।
पीएम मोदी कहलनि, “हम सब मिलिकए एकटा एहेन भारत बनाएब जे ‘विकसित’ सेहो होएत आ ‘समृद्ध’ सेहो।”
ई नव नियुक्ति गृह मंत्रालय, रेल मंत्रालय, श्रम आ रोजगार मंत्रालय, राजस्व विभाग आ उच्च शिक्षा विभागक महत्वपूर्ण मंत्रालय आ संगठन सभमे कएल गेल। अक्टूबर 2022 सँ शुरू भेल रोजगार मेला अभियानक तहत अखनि धरि 10 लाखसँ बेसी स्थायी सरकारी नौकरी देल गेल अछि। पहिल रोजगार मेलामे 75,000 आ दिसम्बर 2023 मे आयोजित 14म मेलामे 71,000 नियुक्ति पत्र वितरित कएल गेल छल।
