रोहतासमे बिजलीक चिंगारीसँ लागल आगि, 25 बीघामे गहूमक फसल राख

रोहतास समदिया
*

बिहारक गर्म पछुआ हवा किसानक लेल एकटा काल बनि गेल अछि। गर्मीक तपिशक कारण आइ-काल्हि ग्रामीण क्षेत्रमे आगि लगबाक घटना तेज भऽ गेल अछि। रोज कतहुसँ आगि लगबाक घटना होइत अछि। रविदिन रोहतासक अकोढीगोला थाना क्षेत्रक भीम करुप आ बिशिनी कलां गाममे आगि लगबाक भयंकर घटना भेल, जतय खेतमे गहूमक फसिल जरि कऽ राख भऽ गेल। शुक्र अछि जे एहि दुर्घटनामे कोनो हताहत होयबाक सूचना नहिं अछि। प्राप्त जानकारीक अनुसार अकोढीगोला थाना क्षेत्रक भीम करुप आ बिशिनी कलां गाममे २५ बीघामे लगाओल गहूमक फसिल जरि कऽ राख भऽ गेल। संगहि कतेको किसानक खेतमे राखल भूसा सेहो जरि गेल । खेतमे आगि लगबाक सूचना देलाक बाद अग्निशमन दल घटनास्थल पर पहुँचि आगि पर काबू पाबय लागल। कोनो तरहेँ गामक लोकक मदतिसँ आगि पर काबू पाबि सकल। गामक लोकक कहब छनि जे बिजलीक तार हुनक खेतसँ गुजरैत अछि आ बिजलीकर्मीक लापरवाहीक कारण बिजलीक खंभासँ बेर-बेर चिंगारी निकलैत रहैत अछि। आरोप अछि जे एहि चिंगारीसँ आगि पसरि गेल आ किसानक लहराइत गहूमक फसिल जरि कऽ राख भऽ गेल। एहनमे आब किसान के माथ पर चिंताक रेखा उभरल अछि। किसान सभक कहब छनि जे कटाई लेल तैयार गहूमक फसिल पूर्ण रूपसँ सूखल छल, तेँ आगि ओकरा नष्ट कऽ देलक। पीड़ित किसानक कहब छनि जे हर साल इएह स्थिति होइत अछि। लापरवाहीक एकटा सीमा हेबाक चाही। बिजली विभाग लोकक लापरवाहीक खामियाजा हम किसान सभ साल भरि झेलैत रहैत छी। किओ नहिं सुनि रहल अछि। एहि बेर सेहो लाखोक नुकसान भऽ गेल। गहूम आ भूसा जरि कए राख भए गेल। 10 बीघामे फसल जरि गेल अछि। एहि बेर जँ मुआवजा नहिं भेटत तखन बिजली विभाग पर केस करब ?