केंद्रीय गृहमंत्री अमित शाह दू दिनक कार्यक्रमक तहत बिहारमे छथि आ चारिटा विभागक 823 करोड़क योजनाक शिलान्यास आ उद्घाटन कयलनि अछि। एहि दौरान ओ चिनी मिलकेँ फेरसँ शुरू करबाक घोषणा कएलनि।
योजनाक शिलान्यास आ उद्घाटन करबाक दौरान केंद्रीय गृह मंत्री अमित शाह लालू प्रसाद यादव आ राबड़ी देवी पर जोरदार निशाना साधलनि। ओ कहलनि राष्ट्रीय जनता दलक शासन कालमे यानी लालू प्रसाद यादव आ राबड़ी देवी केर मुख्यमंत्री कालमे अपहरण, हत्या, लूट आ नरसंहार होइत छल। लालू प्रसाद यादव आ राबड़ी देवीक कारणे बिहारक नाम बदनाम भेल। केंद्रीय गृहमंत्री अमित शाह कहलनि जे बिहारमे जंगलराज छल, आब ई नहि कहल जा सकैत अछि जे जंगलराज अछि, कारण प्रधानमंत्री नरेन्द्र मोदी बिहारकेँ 10 वर्षमे देशक 60 करोड़ गरीबक लेल काज करलनि, लालू प्रसाद बिहारक विकास लेल की कयलथि ? ओ बिहारकेँ सिर्फ जंगलराज देलथि।
केंद्रीय गृह मंत्री अमित शाहक बयान पर प्रतिक्रिया व्यक्त करैत नेता प्रतिपक्ष तेजस्वी यादव कहलनि जे चुनाव आबि रहल अछि तँ ओ लोक सभ पैघ-पैघ घोषणा करैत छथि, मुदा चुनावक बाद ओ जुमला बनि जायत।
तेजस्वी यादव कहलनि जे जँ ओ कहि रहल छथि जे प्रधानमंत्री मोदी बिहारकेँ पैसा देलनि अछि तँ हुनका ई सेहो बतेबाक चाही जे ओ कतय-कतय आ कतेक रकम कुन-कुन मदमे आ कुन सेक्टरकेँ देलनि अछि। हुनका लोकनिकेँ विवरण बयान करब आवश्यक अछि। चुनाव आबि रहल अछि तँ ई लोक घोषणा करैत छथि, मुदा विगत 20 वर्षमे ओ लोक की कएलनि से सभकेँ नहि बतौलनि। लालू जीकेँ गैर देनाइ भिन्न-भिन्न लोकक फैशन बनि गेल अछि। एहीसँ किछु प्रभाव पड़यबाला नहिं अछि। ई लोक झूठ बाजय लेल आयल छथि, झूठ भाषण देत, ठगय केर कोशिश करत, जुमलेबाजी करत आ तखनि हुनकर काज फेरसँ चलि जायत। फेर जतय चुनाव होयत तहि ठाम वापस जयताह।
