मतदाता संशोधन कार्य आ नव मतदाता सूचीकेँ लऽ कऽ केंद्र सरकार आ निर्वाचन आयोग पर लगातार हमला करैत आबि रहल तेजस्वी यादव स्वयं सवालक घेरामे आबि गेल छथि। राष्ट्रीय लोकतांत्रिक गठबंधनक नेता सब शनिदिनसँ तेजस्वी यादव पर हमला कय रहल अछि। हुनका पर वोटर आईडी घोटालाक आरोप लगा रहल छथि।
आब चुनाव आयोग नेता प्रतिपक्ष तेजस्वी यादवकेँ नोटिस पठा देलक अछि। हुनकासँ पूछल गेल जे दूटा ईपीआईसी नंबर कतयसँ आयल ? ताहि लेल अपने ईपीआईसी कार्डक विवरण मूल प्रति सहित आयोगकेँ उपलब्ध कराउ।
चुनाव आयोग पत्र जारी करैत कहलक जे 2 अगस्तकेँ भेल प्रेस कॉन्फ्रेंसमे अहां कहलौं जे मतदाता सूचीक मसौदामे अहांक नाम नहि अछि। जांचक बाद पता चलल जे मतदान केंद्र नंबर 204 (बिहार पशु विज्ञान विश्वविद्यालय के पुस्तकालय भवन) के सीरियल नंबर 416 पर अहांक नाम अछि, जकर ईपीआईसी नंबर RAB0456228 अछि। अहांक अनुसार जेना कि प्रेस कॉन्फ्रेंससँ उद्धृत कएल गेल अछि जे अहांक ईपीआईसी नंबर अछि RAB2916120 प्रारंभिक जांचक अनुसार ईपीआईसी नंबर आरएबी2916120 आधिकारिक तौर पर जारी नहि देखा रहल अछि। कृपया अहांक द्वारा आयोजित प्रेस कॉन्फ्रेंसमे उल्लेखित ईपीआईसी कार्डके विवरण (कार्डके मूल प्रति केर संग) निम्नलिखित हस्ताक्षरितकें उपलब्ध कराउ, ताकि ओकर गहन जांच कयल जा सकय।
अनुमंडल अधिकारी, पटना सदर द्वारा प्रतिपक्षक नेताकेँ भेजल गेल पत्र पर प्रतिक्रिया दैत राजदक प्रवक्ता चित्तरंजन गगन कहलनि जे चुनाव आयोग भाजपाक इशारा पर विपक्षी नेता तेजस्वी यादव सहित महागठबंधनक नेता द्वारा चुनाव आयोगक पूछल गेल सवाल पर ध्यान हटाबय चाहैत अछि आ कतेको बिन्दु पर स्पष्टीकरणक मांग करैत अछि। चुनाव आयोग द्वारा जारी मसौदामे पैघ पैमाना पर गड़बड़ी देखल गेल अछि। जाहि पन्ना पर तेजस्वी यादवक नाम देखाओल गेल अछि ओहि मसौदाक ओही पन्ना पर बहुत रास गड़बड़ी भेटल अछि। मंटू कुमार सेहो ओही घरमे रहैत छथि जतय तेजस्वी रहैत छथि। तहिना मकान नम्बर १०७ मे अलग-अलग उपनाम वला मतदाताक नाम अछि। एक्कहि परिवारक लोक अलग-अलग उपनामक प्रयोग करैत छथि ? एहि विसंगति सभक जिम्मेदार के अछि ? एकर जवाब के देत। निर्वाचन आयोगकेँ स्पष्ट करबाक चाही।
