चुनाव

मतदाता सूचीमे नाम जोड़बाक विशेष अवसर, चुनाव आयोग देलक राहत

पटना समदिया
*

बिहारमे विशेष मतदाता सूची संशोधन (एसआईआर) केर पहिल चरणक काज पूरा हेबाक दिशामे अछि। एम्हर विपक्ष लगातार आरोप लगा रहल अछि जे सरकार वैध मतदाताकें नाम हटा रहल अछि। हालांकि चुनाव आयोग एहि आरोपसॅं इनकार करैत कहलक जे कोनो पात्रक नाम मतदाताक सूचीसॅं नहि हटायल जाएत।

एही क्रममे भारत केर चुनाव आयोग एगो महत्वपूर्ण घोषणा कयलक कि १ अगस्त सॅं १ सितंबर धरि मतदाता वा कोनो भी मान्यता प्राप्त राजनीतिक दलक बीएलओ वा बीएलए द्वारा कयल गेल कोनो गलतीमे सुधार लेल आवेदन करय केर मौका देल जायत। जॅं कोनों पात्र मतदाताकें नाम छोड़ल गेल छै वा कोनों अयोग्य व्यक्तिकें नाम जोड़ल गेल छै, तखन जानकारी दऽ कय ओकरामे सुधार होयत। इ व्यवस्था एसआईआर आदेशकें पृष्ठ 3, पैरा 7 (5) कें तहत लागू होयत। मतदाता सूचीसॅं वंचित लोककेँ एक बेर फेरसॅं एक महीनाक समय होएत जे एहि नामकें जोड़ल जाएत।

भारतक चुनाव आयोग द्वारा जारी आंकड़ाक अनुसार एखनि धरि 99 प्रतिशत मतदाताकें कवर कएल गेल अछि। 20 लाख मृत मतदाता, 28 लाख स्थायी प्रवासी मतदाता आ 7 लाखसॅं बेसी डुअल एंट्री मतदाताक पहिचान कयल गेल अछि। करीब 1 लाख मतदाताक पता नहि चलल अछि। 15 लाखसॅं बेसी मतदाता एखनि धरि एहि फॉर्मकें नहि भरि सकल। कुल 7.17 करोड़ मतदाता (90.89%) कें डिजिटाइज कयल गेल अछि।

एसिआईआर केर तहत, जे मतदाता वा एहि सूचीमे गलत रूपसॅं शामिल छथि वा जे एखनि धरि अपन फॉर्म भरने नहि छथि, ओ 20 जुलाईकें बिहारक 12 प्रमुख राजनीतिक दलक जिला अध्यक्ष द्वारा नामित 1.5 लाख बूथ स्तरक एजेंटकें सौंपल गेल अछि। एकर उद्देश्य सुधार प्रक्रियामे राजनीतिक भागीदारी बढ़ाबै केर संग-संग पारदर्शिताकें बरकरार रखनाई अछि।

जनतब जे चुनाव आयोगक स्पष्ट संदेश अछि जे कोनो योग्य मतदाता वंचित नहि होय आओर एहि सूचीमे कोनो अयोग्य नाम नहि देल जा सकय। विपक्ष केर आपत्तिक बीच आयोग केर पारदर्शी प्रक्रिया आ तकनीकी सहायता बिहारमे अधिक विश्वसनीय आ सटीक मतदाता सूची तैयार करय केर दिशामे एगो मजगूत कदम अछि।

Spread the love