निर्वाचन आयोग बूथ स्तरक एजेंटक ट्रेनिंगक संग कयलक बिहार चुनावक तैयारी शुरू
पटना समदिया
*
बिहार विधानसभामे किछु समय बचल अछि, जाहि कारण निर्वाचन आयोग तैयारी शुरू कऽ देलक अछि। दोसर दिसि राजनीतिक पार्टी द्वारा चुनावक लेल रणनीति बनाओल जा रहल अछि आ ओहि रणनीतिकेँ जमीनी स्तर पर उतारबाक कोशिश सेहो कएल जा रहल अछि। बिहारमे एहि वर्ष विधानसभा चुनाव होयबाक अछि। सभ राजनीतिक पार्टी तँ पहिनेसँ तैयारीमे जुटल अछि। आब भारतीय चुनाव आयोग सेहो बिहारमे आगामी चुनावक तैयारी शुरू कऽ चुकल अछि।
निर्वाचन आयोग राज्यक 200 सँ ज्यादा बूथ स्तरक एजेंटकेँ ट्रेनिंग दऽ रहल अछि।
जनतब जे बिहारक वर्तमान नीतीश सरकारक कार्यकाल 23 नवंबर 2020 सँ शुरू भेल छल। नीतीश सरकारक कार्यकाल एहि साल 2025मे 22 नवंबर धरि अछि। साफ अछि जे एहिसँ पहिने चुनाव होयत। मानल जा रहल अछि जे सितंबरसँ अक्टूबरक बीच आचार संहिता लागत। मानल जा रहल अछि जे अक्टूबरसँ नवंबरक पहिल सप्ताहक बीच वोटिंग आ मतक गिनती सम्पन्न होयत। चुनावक तारीख पर अंतिम फैसला चुनाव आयोगे लेत।
