रविकेँ संध्याकाल ‘मैथिली विकास परिषद, दरभंगा’ केर दिघी स्थित प्रांगणमे लोकप्रिय नवयुवक सामाजिक कार्यकर्ता फवाद ग़ज़ाली केर तेसर पुण्यतिथिक अवसर पर एकटा विचार गोष्ठीक आयोजन कयल गेल। संगोष्ठीक शुरुआत एक मिनटक मौनसँ भेल।
उल्लेखनीय अछि कि फवाद ग़ज़ाली केर असामयिक मृत्यु 28 जुलाई 2022 केँ एम्स दिल्लीमे हेपेटाइटिस एवं मल्टीपल ऑर्गन फेल्योर केर कारण भऽ गेल छल। उपस्थित सज्जन सभ फवादक सामाजिक सक्रियता, मानव मित्रता एवं वैचारिक समरसता केर संग अपन निजी अनुभव सभक भावनात्मक वर्णन साझा कयलनि।
प्रोफेसर अजीत कुमार वर्मा, पूर्व विभागाध्यक्ष हिंदी हुनका एकटा दीप्त दीपक केर असामयिक मिझायब केर संज्ञा देलनि।
प्रोफेसर विद्यानाथ झा (पूर्व प्राचार्य) फवादक सदैव खुश रहब आ आमजनसँ जुड़ल समस्याक प्रति संवेदनाक उल्लेख कयलनि।
ओतहि अजीत कुमार मिश्र (सामाजिक कार्यकर्ता) फवादसँ अपन संबंधक विस्तार पूर्वक जिक्र कयलनि।
‘तालाब बचाओ’ मिशनक प्रसिद्ध सामाजिक कार्यकर्ता नारायणजी दिल्लीसँ अपन लिखित संदेशमे फवादक सकारात्मकता आ निष्पक्ष सक्रियताक सराहना करैत एतेक कम बयसमे हुनक मृत्युकेँ मिथिलांचलक बहुत नुकसान बतेलनि।
एहि संगोष्ठीमे प्रोफेसर नेहाल (जंतु विज्ञान विभाग) फवादक निजी ज़िंदगीक कतेको भावनात्मक अनुभव साझा कयलनि।
जुझारू सामाजिक कार्यकर्ता तासीम नवाब फवादक लगन एवं निर्भीकताकेँ आजुक युवा सभक लेल आदर्श बतेलनि।
एहि संगोष्ठीक कार्यवाहीक सूचना फवादक परिवारजन सभकेँ भेजय केर निर्णय लेल गेल।
