भागलपुरक लोककेँ वन्दे भारत ट्रेनक उपहार भेटल अछि। आब एकर परीक्षण भऽ गेल अछि, जल्दिये ई ट्रेन पटरी पर चलैत देखल जायत। एहि ट्रेन सेवाक शुरुआतसँ लोककेँ बहुत लाभ होबय जा रहल अछि।
केंद्र सरकार बिहारक भागलपुरक लोककेँ एकटा पैघ उपहार देलक अछि। भागलपुरकेँ वन्दे भारत ट्रेनक उपहार भेटल अछि। एहिठामक लोककेँ केसरिया रंगक चमकैत ट्रेन भेटल अछि। ई ट्रेन भागलपुरसँ भाया, हंसडीहा, दुमका, रामपुरहाट होइत हावड़ा धरि चलत। १५ सितंबरकेँ एहि ट्रेनकेँ झंडी देखा कऽ रवाना कयल जायत। एहिसँ पहिने शुक्रकेँ एकर ट्रायल रन भऽ चुकल अछि। ट्रायल रन ११० केर गतिसँ कयल जा रहल अछि।
एकर परीक्षणमे भागलपुरसँ दुमका धरि चलाओल जा रहल अछि। वन्दे भारत ट्रेनक भीतरक चित्र बहुत शानदार अछि। नव आ चमकैत ट्रेनसँ एहिठामक लोककेँ बहुत लाभ होयत। मालदा रेलवे डिवीजनक डीआरएम मनीष कुमार परीक्षणक दौरान उपस्थित छलाह। १५ सितम्बरकेँ अपन पहिल दिन ई ट्रेन भागलपुरसँ भोर ११ बजे खुलत। एकर बाद १७ सितम्बरसँ इ ट्रेन स्थायी रूपसँ ३.२० बजे खुजत। ई ट्रेन भोरे ९.२० बजे हावड़ा पहुँचत। भागलपुरक बाद ई ट्रेन बाराहाट, मंदार हिल, हंसडीहा, नोनीहाट, दुमका, रामपुरहाट आ बोलपुरमे रुकत। वापसी यात्रा पर ई ट्रेन हावड़ासँ भोर ७.४५ बजे प्रस्थान कऽ २.०५ बजे भागलपुर पहुँचत।
वन्दे भारत ट्रेनपर पथरावक घटनाक बाद प्रशासन सतर्क स्थितिमे अछि। उद्घाटनक दिन ट्रेनक सुरक्षा रेलवे पुलिसक एकटा अधिकारी आ एके-४७ सँ लैस पाँचटा कर्मी द्वारा कयल जायत। जाहिसँ एहेन घटना करबासँ पहिने असामाजिक तत्वसभकेँ रोकल जा सकय। एहि ट्रेनमे ८टा डिब्बा होयत, जाहिमे ५३० यात्री यात्रा कऽ सकैत छथि। एहिमे एकटा एक्जीक्यूटिव कोच आ ७ टा चेयर कार अछि। यात्रीकेँ ट्रेनमे उपलब्ध सभ सुविधा देल जायत। ई ट्रेन धार्मिक आ व्यापारिक दृष्टिकोणसँ काफी सुविधाजनक अछि, किएक तँ भागलपुरसँ बासुकीनाथ, देवघर, तारापीठक सङ्ग-सङ्ग कोलकाता जयब सुविधाजनक होयत। ई सुविधा भेटलासँ यात्रीसभकेँ बहुत लाभ होयत।
