भोजपुर जिलासँ एकटा घटना सामने आयल अछि, जतय एक्कहि परिवारक पाँच गोटे जहर खा लेलक। ई मामिला जिलाक बिहिया थाना क्षेत्रक बेनवलिया गामक अछि। एतय एक्कहि परिवारक पाँच गोटे जहर खा लेलक, जाहिमे सँ तीनटाक मृत्यु भऽ गेल आ दूटा केर हालत गम्भीर अछि। ई घटना पूरा क्षेत्रकेँ हिला देलक अछि।
इलेक्ट्रॉनिक्स स्टोर चलायवला अरविन्द कुमार अपन दु बेटी आ दु बेटाक संग जहर खा लेलनि। परिवारक तीनटा सदस्यक मृत्यु भऽ गेल, जखनि कि दूटा लोकक इलाज एकटा निजी अस्पतालमे चलि रहल अछि। मृतकमे अरविन्द कुमारक तीनटा बच्चा छल, जकर नाम नन्दनी कुमारी (१२ वर्ष), टोनी कुमार (६ वर्ष) आ डॉली उर्फ पलक कुमारी (३ वर्ष) अछि।
एम्हर इलाजक लेल अस्पतालमे भर्ती लोकमे अरविन्द कुमारक बेटा आदर्श कुमार (१० वर्ष) आ स्वयं अरविन्द कुमार अछि। दुनूक हालत गंभीर अछि आ इलाज चलि रहल अछि।
पुलिसक प्रारंभिक जाञ्चक अनुसार, अरविन्द कुमारक पत्नीक पछिला साल निधन भऽ गेलनि, जकर बाद ओ मानसिक तनाव आ आर्थिक कठिनाइसँ जूझि रहल छथि। घटनाक सूचना भेटैत पुलिस घटनास्थल पर पहुँचल आ मामिलाक जाँच शुरू कऽ देलक अछि।
