दरभंगाक मनिगाछी थाना क्षेत्रमे वन्यजीव अपराध नियंत्रणक टीम तीन तस्करकेँ गिरफ्तार कए आठ गोट मगरमच्छकेँ बचा लेलक अछि। कहल जा रहल अछि जे तस्कर मगरमच्छक बच्चा सभकेँ एकटा घरमे नुका कऽ रखने छल।
मिथिला क्षेत्रीय बिहारक दरभंगामे वन विभागक टीम ८टा मगरमच्छक सङ्ग ३ तस्करकेँ गिरफ्तार कयलक अछि। वन विभागक टीमकेँ स्थानीय लोकसँ सूचना भेटल छल जे किछु लोक मगरमच्छक तस्करी करय जा रहल छथि। जकर बाद टीम कारवाई कयलक आ लोककेँ गिरफ्तार कऽ लेलक। तस्कर बच्चा मगरमच्छकेँ एकटा घरमे नुका देने छल आ जल्दिये ओकरा दोसर ठाम स्थानांतरित करय जा रहल छल।
मगरमच्छ तस्करीक मामिलामे दरभंगाक मनीगाछी थानाक पुलिस एकटा महिला सहित तीनटा तस्करकेँ गिरफ्तार कयलक अछि। गिरफ्तार तस्करक पहिचान सुपौल जिलाक निवासी विजय बंजारा, गोविन्द बंजारा आ किरण देवीक रूपमे भेल अछि। मिथिला वन मण्डल अधिकारी भास्कर चन्द्र भारती कहलनि जे मनीगाछीक किछु लोक वन्यजीव अपराध नियंत्रण टीमकेँ सूचित कयने छलाह जे किछु गोटे अपन घरमे मगरमच्छ रखने अछि, जे ओकर तस्करी करैत अछि। जहिना मामिलाक सूचना भेटल, टीम सक्रिय भऽ गेल आ ओ छापा मारैत ८ गोट मगरमच्छक बच्चाकेँ बचा लेलक आ ३ लोककेँ गिरफ्तार कयलक। छापामारीक दौरान वन विभागक टीमकेँ मगरमच्छक एकटा पैघ खाल सेहो भेटल। कहल जा रहल अछि जे मगरमच्छकेँ तस्करीक लेल आनल गेल छल आ एकटा घरक एकटा कोठरीमे राखल गेल छल। मामिलाक जानकारी भेटलाक बाद स्थानीय लोक सेहो मगरमच्छकेँ देखबा लेल जमा भऽ गेलाह। स्थानीय लोकक कहब छनि जे संरक्षित वन्यजीवक लगातार तस्करी कयल जा रहल अछि।
ई पूरा कारवाई स्थानीय लोकक जानकारीक बाद कयल गेल अछि।
पुलिस तस्करक खिलाफ मामिला दर्ज कऽ न्यायिक हिरासतमे पठा देलक अछि। संगहि, मगरमच्छकेँ सुरक्षित स्थान पर छोड़ि देल गेल अछि। एहि कारवाईक बाद चारूकात वन्यजीव अपराध नियंत्रणकक प्रशंसा कयल जा रहल अछि।
