प्रवर्तन निदेशालय (ईडी) झारखण्डक राजधानी राँचीक विभिन्न क्षेत्रमे छापा मारलक अछि। वीरेन्द्र राम मामिलामे झारखण्डक ग्रामीण विकास मंत्री आलमगीर आलमक निजी सचिव संजीव लालक घरेलू सहायकसँ भारी मात्रामे नकदी बरामद कयल गेल अछि। नोट गिनती मशीन संजीव लालक घर आनल जा रहल अछि। एखन धरि २० करोड़ टाकासँ बेसी केर गिनती कएल जा चुकल अछि। अधिकारी सभ कहलनि कि गिनती एखनो जारी अछि। सूत्रक अनुसार ई नकदी ५०० रूपैयाक नोटमे बरामद कयल गेल अछि। संजीव लालक निवास पर स्टीलक ट्रंक आनल गेल अछि।
दरअसल पछिला साल फरवरीमे ईडी झारखंड ग्रामीण विकास विभागक मुख्य अभियंता वीरेन्द्र रामकेँ धनशोधनक मामिलामे गिरफ्तार कयने छल। लम्बा पूछताछक बाद ईडी हुनका गिरफ्तार कयलक। पूछताछक दौरान वीरेन्द्र राम ईडीक सामने कतेको पैघ व्यक्तिक संग अपन संबंधक खुलासा सेहो कयलनि। जानकारीक अनुसार रामक घरमे १५० करोड़क सम्पत्ति भेटल छल। एकर अतिरिक्त दू करोड़क सोनाक गहना सेहो बरामद कयल गेल। ईडी वीरेन्द्र रामसँ एकटा लैपटॉप आ किछु पेन ड्राइव सेहो बरामद कयने छल। ईडी पछिला साल २१ फरवरीकेँ २४ स्थानपर छापा मारब शुरू कयलक जे २२ फरवरीकेँ समाप्त भऽ गेल। छापा मारबाक क्रममे बरामद दस्तावेजक आधारपर एजेंसी वीरेन्द्र रामसँ दू दिन धरि पूछताछ कयलक।
ईडी अदालतकेँ कहलक जे राम आ हुनक परिवारक बैंक खाताक जाञ्चमे हुनकर आयक कानूनी स्रोतसँ बेसी धनक खुलासा भेल छल। आरोप अछि जे राम अपन पिता, पत्नी आ परिवारक अन्य सदस्यक नाम पर चल आ अचल संपत्ति अर्जित कयलनि। ई सम्पत्ति परिवारक आयक आनुपातिक नहिं अछि। सितम्बर २०२० मे वीरेन्द्र रामक विरुद्ध धनशोधनक शिकायत दर्ज कयल गेल छल।
एम्हर आलमगीर आलम कहलनि जे संजीव लाल सरकारी कर्मचारी छथि। ओ हमर निजी सचिव छथि। संजीव लाल पहिनेसँ दूटा पूर्व मन्त्रीक निजी सचिवक रूपमे काज कऽ चुकल छथि। कतेको सरकारी कर्मचारी छथि आ हम सामान्यतः अनुभवक आधार पर निजी सचिवक नियुक्ति करैत छी। ईडीक जांच पूरा होबएसँ पहिने छापामारी पर टिप्पणी उचित नहिं अछि।
