मुजफ्फरपुर जिलाक तुर्की थाना क्षेत्रक सुमेरा गाममे आपसी विवाद खतरनाक रूप लऽ लेलक। रविदिन देर साँझ तीनटा आरोपी पड़ोसीक घरमे घुसि अंधाधुंध गोली चला देलक। घटनामे अजय साह (४०) के घटनास्थल पर मृत्यु भऽ गेल, जखन कि हुनकर पिता सुरेश साह (७०) आ बेटा अंकुश (१३) केँ गंभीर हालतमे अस्पतालमे भर्ती कराओल गेल।
मृतकक भाय चन्दन कुमार कहलनि जे ई विवाद दू साल पहिने शुरू भेल छल। जमीनक लऽ कऽ दुनू पक्षक बीच कहासुनी आ झगड़ा सेहो भेल। पछिला साल एकर समाधान भऽ गेल छल, मुदा चारि मास पहिने विवाद फेरसँ भड़कि गेल। राजा, राहुल आ जीतेन्द्र तीनू आरोपी, अजय आ हुनक परिवारकेँ कतेको बेर धमकी देने छल।
देर साँझ तीनू आरोपी अचानक अजय साहक घर पहुँचल आ ओकरा पर हमला कऽ देलक। ओ सभ अजय, ओकर पिता आ बेटा पर गोली चला देलक। अजयक मौकापर मृत्यु भऽ गेल, जखनि कि सुरेश साह आ अंकुशकेँ स्थानीय अस्पतालमे भर्ती कराओल गेल अछि। डॉक्टरक अनुसार दुनूक हालत गंभीर बनल अछि।
घटनाक सूचना भेटैत तुर्की पुलिस स्टेशन घटनास्थल पर पहुँचि पूरा क्षेत्रकेँ घेरि लेलक। एफएसएल टीमकेँ एहि मामिलाक जाँचक लेल बजाओल गेल छल। पुलिस आरोपीके पकड़बाक लेल तलाश शुरू कऽ देलक अछि। अधिकारीक कहब छनि जे जल्दिये तीनू गोटेकेँ गिरफ्तार कऽ लेल जायत।
एहि घटनाक बाद पूरा गाममे भय आ आक्रोशक माहौल अछि। स्थानीय लोकनि प्रशासनसँ आरोपीक खिलाफ सख्त कारवाई करय केर मांग कय रहल छथि। परिवारक सदस्यक कहब छनि जे आरोपी जानिबूझि कऽ ई घटना कयलक। डॉ. गौरव वर्माक अनुसार, अजय साहकेँ अस्पताल अनबासँ पहिने मृत घोषित कऽ देल गेल। हुनकर पिता आ बेटाक इलाज चलि रहल अछि। ई घटना एक बेर फेर आपसी विवादक खतरनाक परिणामकेँ उजागर कऽ देलक अछि।
