दरभंगामे बस स्टैंड पर नशेड़ी एसआई के मारलक चक्कू

दरभंगा समदिया
*

दरभंगा जिलाक लहेरियासराय बस स्टैंड पर नशाक आदी लोकक दूटा समूहक बीच भेल झगड़ामे पुलिसक हस्तक्षेप पुलिस लेल महग साबित भेल। हंगामा रोकबाक लेल गेल प्रशिक्षु एसआई पीयूष कुमार आ अंकुर पासवान पर नशेड़ी चाकूसँ हमला कयलक, जाहिसँ दुनू घायल भऽ गेलाह। हुनका सभकेँ दरभंगा मेडिकल कॉलेज अस्पतालमे भर्ती कयल गेल अछि, जतय हुनकर इलाज चलि रहल अछि।

घटनाक संबंधमे बताओल जा रहल अछि, जे लहेरियासराय बस स्टैंड पर नशाखोरक दु गुटक बीच मारिपीटमे चकूबाजीक सूचना भेटल, सूचना भेटलाक बाद लहेरियासराय थानाक पुलिस मौका पर पहुंचि दुनु गुटक बीच भs रहल मारिपीटके रोकबाक प्रयास कयलनि। एहि पर नशाखोर सभ प्रशिक्षु एसआई पीयूष कुमार आ अंकुर पासवान के चकू मारि कs घायल कs देलक।
पुलिस मौका पर सs हमलाक लेल इस्तेमाल कैल गेल चकू बरामद कs लेल गेल आ आगुक कारवाई कs रहल अछि।

वर्तमानमे पुलिस घटनास्थलसँ दूटा लोककेँ हिरासतमे लऽ कऽ पूछताछ कऽ रहल अछि।गिरफ्तार कयल गेल दुनू अपराधी बलभद्रपुर इलाकाक निवासी अछि।

एहि संबंधमे लहेरियासराय थानाक प्रमुख दीपक कुमार कहलनि जे दूटा समूहक बीच झगड़ाक सूचना भेटलापर पुलिसकेँ लहेरियासराय बस स्टैंड पठाओल गेल। दुनू गुटक बीच मध्यस्थताक लेल गेल प्रशिक्षु एसआई पीयूष कुमारकेँ चाकू मारल गेल। घायल पुलिस अधिकारीकेँ इलाजक लेल डीएमसीएचमे भर्ती कयल गेल अछि। एम्हर गिरफ्तार कयल गेल दूटा संदिग्ध सिन्धु चौधरी आ संस्कार कश्यपसँ पूछताछ कयल जा रहल अछि।