भारत सरकारक पर्यटन मंत्रालय २३ राज्यक वैश्विक स्तर पर प्रतिष्ठित पर्यटन केंद्रमे कुल ४० परियोजनाक विकासक मंजूरी देलक अछि। एहि क्रममे बिहारमे दू गोट पर्यटन स्थलक चयन कयल गेल अछि, जाहिमे सहरसाक मत्स्यगंधा झील शामिल कयल गेल अछि। केंद्र सरकार मत्स्यगंधाक पूर्ण विकास लेल योजना तैयार कयलक अछि। एकरा केंद्र सरकार द्वारा लगभग ९७.६१ करोड़ रुपयासँ विकसित कएल जाएत।
सहरसा विधायक डॉ. आलोक रंजन कहलनि जे मत्स्यगंधा झीलक सौंदर्यीकरण लेल हम सब बहुत प्रयास कयलहुँ। जकर परिणाम आई सामने आयल, जे केंद्र सरकार द्वारा बिहारक दू टा पर्यटन स्थलक सौंदर्यीकरणमे सहरसा मत्स्यगंधाकेँ शामिल कयल गेल अछि। मत्स्यगंधा झीलक सौन्दर्यीकरण हम अपन चुनावी वादामे राखने रही। आइ हमर ई संकल्प पूरा भेल अछि। सहरसाक जनताक तरफसँ देशक प्रधानमंत्री नरेंद्र मोदी, केंद्रीय पर्यटन मंत्री गजेन्द्र सिंह शेखावत, बिहारक मुख्यमंत्री नीतीश कुमार, उपमुख्यमंत्री द्वय सम्राट चौधरी, विजय सिन्हा आ पर्यटन मंत्री नीतीश मिश्र केर धन्यवाद दैत छी।
विधायक आलोक रंजन आगू कहलनि जे हम विधानसभामे मत्स्यगंधा झीलक सौंदर्यीकरणक मुद्दा सेहो उठेलौं आ सरकारसँ आग्रह कयलौंह। तुरंत हमरा सरकार द्वारा आश्वासन देल गेल। हम सब उपमुख्यमंत्री सम्राट चौधरी आ पर्यटन मंत्री नीतीश मिश्रासँ भेंट कयलहुँ आ सहरसाक सुप्रसिद्ध मांग मत्स्यगंधा झीलकेँ सुंदर बनेबाक आग्रह कयलहुँ। हमर आग्रह पर ओ एकटा टीम पठौलनि, मत्स्यगंधा झीलक सर्वेक्षणक काज करा देलखिन्ह आ केंद्र सरकारक पर्यटन विकास योजनामे शामिल करा देलनि।
मत्स्यगंधा झीलक सौंदर्यीकरण लेल केंद्र सरकार द्वारा करीब 97.61 करोड़ रुपयाक राशि मंजूरी देल गेल अछि। एहिमे राजगीरक तर्ज पर मत्स्यगंधामे कांच केर पुल सहित कतेको तरहक योजना शामिल अछि।डा रंजन कहलनि हम सब सहरसाक जनताक तरफसँ अपन सरकारक प्रति आभार व्यक्त करैत छी।
