बिहारक मुख्य विपक्षी दल राष्ट्रीय जनता दल (राजद) बृहस्पति दिन नीतीश कुमारक सरकार पर कटाक्ष करैत राज्यक कानून-व्यवस्था पर सवाल उठौलक। नेता प्रतिपक्ष आ पूर्व उपमुख्यमंत्री तेजस्वी यादव कतेको आपराधिक घटनाक उल्लेख करैत सरकारपर जोरदार निशाना साधने छथि। पूर्व उप मुख्यमंत्री तेजस्वी यादव बृहस्पति दिन सरकार पर कटाक्ष करैत अपन एक्स अकाउंट पर लिखलनि, “बिहारमे किछु घंटाक डबल इंजन सरकारक ‘मंगलराज’ केर अद्भुत आपराधिक दृश्य देखू। मुख्यमंत्रीसँ लऽ कऽ दूटा उपमुख्यमंत्री धरि पूरा अमला आपराधिक घटना पर आपराधिक चुप्पी साधि लेने अछि।” एकर बाद ओ छपरामे दूटा वकीलक हत्या, नवादामे बीच रास्ता पर महिलाकेँ चाकू मारब, पटनामे दू बहिन पर चाकूसँ हमला, भागलपुरमे बदमाश निर्वस्त्र कय महिलाकेँ पीटि-पीटि कय निर्मम हत्या करब आदि कतेको घटनाक जिक्र कयलनि।
राजद प्रमुख लालू प्रसाद यादवक बेटी रोहिणी आचार्य जे सारणसँ राजद प्रत्याशी छलीह, छपरामे दू टा वकीलक हत्याक मामिलामे बिहार सरकार पर निशाना साधने छथि। रोहिणी आचार्य अपन एक्स अकाउंटसँ लिखलनि, “छपरामे कानून-व्यवस्थाक स्थिति लगातार बिगड़ि रहल अछि, प्रशासनकेँ बिना देरी कयने अधिवक्ता पिता-पुत्रक हत्यारासभक गिरफ्तारी सुनिश्चित करबाक चाही। भाई चन्दनक हत्याक चलि रहल जाञ्चक प्रगति रिपोर्ट सेहो सार्वजनिक कयल जेबाक चाही। जाञ्चक सन्दर्भमे नियमित मीडिया-ब्रीफिंग सेहो होयबाक चाही।”
उल्लेखनीय अछि जे बुधदिन छपरामे अपराधी सभ दूटा ओकीलकेँ गोली मारि हत्या कऽ देलक। ओ दुनू पिता आ पूत्र छलाह। एहि घटनाक संबंधमे दू गोटेकेँ गिरफ्तार कयल गेल अछि।
