मैथिल समाज रहिका, मधुबनीमे मिथिला विभूति प्रो. शीतलाम्बर झा (महासचिव) केर कुशल संचालनमे ५२म त्रिदिवसीय ‘मिथिला विभूति स्मृति पर्व समारोह’क दोसर दिन काल्हि दिनमे ‘प्रगति पथ पर मैथिली’ विचार गोष्ठी छलैक, रात्रिमे कवि सम्मेलन, सम्मान समारोह आ सांस्कृतिक कार्यक्रम सम्पन्न भेल।
मुख्य अतिथि आ उद्घाटन कर्ताक रुपमे मंच पर उपस्थित छलथि बिहार प्रदेश कांग्रेस कमेटीक पुर्व अध्यक्ष एवं वर्तमानमे एमएलसी डाॅ मदन मोहन झा। मिथिला-मैथिलीक प्रति पार्टी लाइनसँ हँटि कऽ डाॅ मदन मोहन झा’क सुलझल वक्तव्य सभकेँ प्रभावित कयलक।
मैथिली अखबार ‘मैथिल पुनर्जागरण प्रकाश’क संपादक अजय नाथ झा शास्त्री सेहो मंच पर उपस्थित छलथि। संस्थाक महासचिव मिथिला-मैथिलीक ध्वजवाहक प्रो. शीतलाम्बर झा द्वारा मैथिली अखबारक स्थिति पर चर्चाक उत्तरमे डाॅ मदन मोहन झा सारगर्भित आश्वासन आ समस्त मिथिलावासीकेँ एकरा प्रति साकांछ होयबाक आह्वान कयलनि।
वरिष्ठ साहित्यकार भीम नाथ झा अपन उद्बोधनमे विशेष रूपसँ मखानक बदला ‘मखाना’ शब्दक प्रयोग पर एतराज जताबैत एकर गंभीर प्रभाव दिसि इशारा कयलनि। ओ कहलनि जे पान केर ‘पाना’ कहबै तऽ केहेन लागत
चर्चित वरिष्ठ साहित्यकार आ कवि आ एहि समितिक प्रायः मुख्य संस्थापक उदय चंद्र झा ‘विनोद’ आगत-अतिथिकेँ स्वागत सम्बोधन कयलनि आ हिनके अध्यक्षतामे भव्य कवि सम्मेलन भेल।
कवि लोकनिमे मंच पर भीमनाथ झा, दिलीप झा, प्रीतम निषाद, चन्द्र मोहन पड़वा, हिरेन्द्र झा, फूल चंद्र प्रवीण, सदरे गौहर, विनय विश्व बंधु, डाॅ इन्द्रमोहन झा, मैथिल प्रशांत, अशोक कुमार मेहता, अजित आजाद, आनंद मोहन झा, मनोज झा, मेनका मल्लिक, डा.बिभा कुमारी आदि उपस्थित छलथि। मिथिला रत्न कुंज बिहारी मिश्रक उल्लेखनीय उपस्थिति छल।
चर्चित समाजसेवी आ नेतृत्वकर्ता एवं मिथिला-मैथिलीक अनन्य सेवी एहि संस्थाक अध्यक्ष सुमन कुमार महासेठ मंचस्थ छलथि आ हुनका द्वारा अनेक अतिथि सम्मानित भेलथि। मैथिल समाज रहिकाक स्मारिका एवं आदरणीय श्री उदय चंद्र झा ‘विनोद’क चर्चित रचना ‘जुलूम भऽ गेलै’ केर नवारंभ प्रकाशनसँ प्रकाशित पोथीक विमोचन सेहो भेल।
मुख्य पुरस्कारमे पोथी ‘परगोत्री’क लेल हीरेन्द्र कुमार झाकेँ ‘किरण पुरस्कार’सँ सम्मानित कयल गेल, संगहि पोथी ‘पंछी बनी गगन केर’ लेल अशोक कुमार मेहताकें ‘यात्री पुरस्कार’सँ सम्मानित कयल गेल।
पुनः सांस्कृतिक कार्यक्रम भेल जाहिमे कुंज बिहारी समेत अनेक गायक-गायिका उपस्थित छलथि। प्रसिद्ध रचनाकार आ गीतकार आकाशवाणी दरभंगाक उद्घोषक एवं मिथिला-मैथिलीक चर्चित व्यक्तित्व मणिकांत झा’क सेहो उपस्थिति छल मंच पर।
