अमेरिकी राष्ट्रपति डोनाल्ड ट्रम्प कहलनि अछि जे भारत बहुत बेसी शुल्क वला देश अछि। ट्रम्प दोहरओलक जे अमेरिकी वस्तु पर शुल्क लगयवला देशसभ पर जबाबी शुल्क २ अप्रैलसँ प्रभावी होयत।
ट्रम्प कहलनि “पैघ बात २ अप्रैलकेँ होयत जखनि जवाबी शुल्क लागू होयत, चाहे ओ भारत होय वा चीन वा जे कोनो देश होय। भारत बहुत बेसी शुल्क लगाबयवाला देश अछि।”
बृहस्पतिकेँ ओवल ऑफिसमे कार्यकारी आदेशपर हस्ताक्षर करैत ट्रम्प कहलनि, “हम अहाँकेँ बता दैत छी जे उच्च शुल्क वला राष्ट्र के अछि। ओ कनाडाई अछि। कनाडा हमरासँ हमर दुग्ध उत्पाद आ अन्य उत्पाद पर २५० प्रतिशत शुल्क लैत अछि आ लकड़ी आ ओहेन तरहक वस्तु पर बहुत बेसी शुल्क लगबैत अछि। हमरा ओकर लकड़ीक जरूरत नहि अछि। हमरा लग ओकरासँ बेसी लकड़ी अछि। हमरा कनाडाक लकड़ी के जरूरत नहि अछि।”
ट्रम्प इहो कहलनि जे शुल्क एखनि “अस्थायी” आ “कम” अछि, मुदा जवाबी शुल्क २ अप्रैलसँ शुरू होयत आ ई हमर देशक लेल “बहुत परिवर्तन आनयवाला” होयत।
ओ कहलनि “दुनियाक हर देश हमरा लूटलक अछि। ओ हमरासँ १५०-२०० प्रतिशत शुल्क लैत अछि (आ) हम हुनका सभसँ किछु शुल्क नहि लैत छी। तेँ ओ सभ हमरासँ जे शुल्क लेताह, हमसभ हुनका सभसँ ओतबे शुल्क लेब आ कियो ओहिसँ बचि नहि सकत। तेँ हम 2 अप्रैल केर इंतजार कए रहल छी। हम बहुत दिनसँ ओहि तिथिक प्रतीक्षा कए रहल छी आ ई एकटा पैघ बात होएत।”
मंगलकेँ व्हाइट हाउसमे अपन दोसर कार्यकालक दौरान कांग्रेसक पहिल संयुक्त सत्रकेँ सम्बोधित करैत ट्रम्प भारत आ अन्य देश द्वारा लगायल गेल उच्च शुल्ककेँ “बहुत अनुचित” बतबैत आलोचना कयलनि।
